
बीबीसी – बलिउड अभिनेता सुशान्त सिंह राजपुतं आइतवाः आत्महत्या यायेवं मानसिक स्वास्थ्यया बारे बहस सुरु जूगु दु । ३४दँया अभिनेता आइतवाः मुम्बईया थःगु छेँय् सिनाच्वंगु अवस्थाय् लूगु खः । घटनायात प्रहरीं आत्महत्या जुइफुगु खँ धाःगु खः ।
घटना लिपा अभिनेताया फ्यान व बलिउडकर्मीतय्सं दुःख प्वंकाः न्ह्याःगु बहस मानसिक स्वास्थ्ययापाखे हिलावंगु दु ।
डिप्रेसनया विरुद्ध ल्वयेमाः धकाः खुल्ला रुपं धयाच्वम्ह बलिउड अभिनेतृ दिपिका पाडुकोणं थुकीया बारे सरोकार क्यनेमाःगु खँ धाःगु दु ।
‘खँल्हाबंला यानादिसं, अभिव्यक्त यानादिसं, ग्वाहालिया निंतिं धयादिसं’ पाडुकोणं थःगु इन्स्टाग्रामय् च्वयादी, ‘लुमंकादिसं, छि याकचा मखु । झीपिं फुक्कं थुकी नापं दु । अले दकलय् महत्वपूर्ण, अन आशा दु ।’
सुशान्त सिंह राजपुतनाप ‘पिके’ संकिपाय् म्हितुम्ह अभिनेतृ अनुश्का शर्मां च्वयादी, ‘जि तसकं दुःखी व उदास जुयाच्वना छाय् धाःसा झी थज्याःगु लकसय् म्वानाच्वना गुकीं झीके दयाच्वंगु छुं नं समस्यायात ग्वाहालि यायेफयाच्वंगु मदु ।’
भारतीय समाजय् मानसिक स्वास्थ्य समस्याया बारे गतल बुझाईया कारणं थुकीया बारे खँल्हाय् तसकं थाकूगु खँ मेपिं आपलं मनूतय्सं धायेगु यानाच्वंगु दु ।
‘भारतय् मानिसक समस्या बारेया बहस गन थ्यनेमाःगु खः वस्वयां कोशौं दूरी तापा । थौं सुशान्त सीगु बारे दुःख प्यंकाच्वंपिं कयौं कन्हय् थःपिंसं म्हसिउपिं सुं अज्याःगु अवस्थाय् वन धाःसा उमिगु हे बांमलागु खँल्हानाच्वनी ।,’ द इन्डियन इक्सप्रेशया सहर सम्पादक राहुल सभरवालं ट्वीट यानादी ।
मेम्ह सामाजिक सञ्जाल प्रयोकर्ता नूरीन वोजरं धाल, ‘यदि उदास जुयाच्वंसा थुकीं याकन पिहांवाः धका हालाजक च्वनीगु मानसिकता स्वयां भारतया छेँखा छेँखाय् मानसिक स्वास्थ्ययात प्राथमिकता बीमाः ।’
अथेखसां भारतया मानसिक स्वास्थ्य कानून व नीति केन्द्रया निर्देशक डा. सोमित्रा पाथरें बीबीसनाप खँल्हाबंला यासें उदाशीनता व आत्महत्याया बारे खँल्हायेगु आवश्यक जूसां भारत थज्याःगु देशय् निगू विषय ल्वाकछ्यायेमजिउगु ख्याच्वः बियादी ।
‘अनुसन्धानं बेलायत व युरोपय् डिप्रेशनया कारणं ८० प्रतिशत आत्महत्या जुइगु याः । तर मेमेगू आपलं थाय् जस्तै भारतय् आत्महत्या याइगु मेगू थीथी कारण दु ।’ वय्कलं धयादी, ‘थन आत्महत्या याइपिंनि तथ्याङक तसकं पाः ।’
‘जस्तै, ल्यासे मिसात सीगु प्रमुख कारण आत्महत्या खः । गुलिं आवेगय् वया थ्व ज्या याइसा घरेलु हिसां मेगू महत्वपूर्ण पक्ष खः । अथेहे, १८दँ स्वयां म्हो उमेरयापिंत परीक्षाया तनाव छगू प्रमुख कारण खः, अथेला ग्रामिण भारतय् च्वंपिं किसानतय्सं आर्थिक अवस्थाया कारणं थःगु ज्या यायेगु यानाच्वंगु दु ।,’ वय्कलं धयादिल ।
टिभी व फिल्म निगूलिं ख्यलय् याःगु कलाकारिताया निंतिं प्रख्यात राजपुत नांजाःम्ह क्रिकेट कासामिया जीवनी म्हितुगु ‘एसएस धोनी : द अनटोल्ड स्टोरी’या निंतिं मनूतय्सं अप्व म्हसिउ ।
राजपुतया अन्तिम संस्कार सोमवाः जुइ ।
LEAVE YOUR COMMENTS