बार्सिलोना त्यात, मेसीया पेनाल्टी मिस

स्पेनिस ला लिगाय् शीर्ष थासय् च्वंगु बार्सिलोना रियल भालाडोलिडयात १—० गोलं बुकूगु दु । बार्सिलोनाया घरेलु मैदान नाउ क्याम्पय् जूगु कासाय् कप्तान लियोन मेसीं कासाया ४३ औं मिनेटय् छगू जक पेनाल्टी गोल याःगु खः । जेरार्ड पिकेयात मिसेलं फल तयेवं बार्सिलोनायात थ्व पेनाल्टी चूलाःगु खः ।

निगुगू हाफया ८५ औ मिनेटय् फिलिप कान्टिहोयात किको ओलिभासं दयेकेवं बार्सिलोनायात मेगु पेनाल्टी नं चूलाःगु खः, तर मेसीं हे थ्वाःगु थ्व पेनाल्टी धाःसा भालाडोलिडया गोलरक्षक जोर्डी मासिप पनाबिल । गोलरक्षक मासिप बार्सिलोनाया तःगू हे प्रहार पंगु खः ।

रियल भालाडोलिडयात बुकूगु बार्सिलोना लिगया शीर्ष थासय् दु । मेखे लियोनल मेसी थ्व सिजनय् म्हितूगु दक्व धेंधेंबल्लाखय् याःगु गोल ३० गू थ्यंगु दु । मेसीं लिपांगु ११ सिजनय् म्होतिं नं ३० गू गोल याःगु दु ।अथेहे ला लिगाया मेगु कासाय् रायोे भालाकोनोयात १–० बुकाः एथलेटिको म्याड्रिड लिगया निगूगु थासय् थहां वंगु दु । एथलेटिकोया एन्टोनी ग्रिजम्यानं कासाया ७४ औं मिनेटय् गोल याःगु खः ।

एथलेटिको म्याड्रिड शीर्ष थासय् लानाच्वंगु बार्सिलोना सिबे ७ अकं लिउने दु । छगू कासा कम म्हितूगु रियल म्याड्रिड लिगया स्वंगूगु थासय् दु । ला लिगा अन्र्तगत जूगु मेगु कासाय् सेल्टा डी भिगोयात लेभान्टें ४—१ गोलं व रियल सोसिडाडं लेगानेसयात ३–० गोलं बुकूगु दु ।

सम्बन्धित बुखँ

LEAVE YOUR COMMENTS