ने. सं. ११४४ कौलाथ्व चौथी -

बालकुमारी गोलीकाण्ड : निम्ह मन्त्रीया भूमिका छानविन यायेत संसदीय समितिया निर्देशन

संसद्या राज्य व्यवस्था व सुशासन समितिं यलया बालकुमारीइ प्रहरीया गोली लानाः निम्ह ल्याय्म्हत सीगु घटनायात कयाः निम्ह मन्त्रीया भूमिकायात कयाः नं छानविन यायेत सरकारयात निर्देशन बिउगु दु । समितिं श्रम, रोजगार तथा सामाजिक सुरक्षामन्त्री शरत् सिंह भण्डारी व भौतिक पूर्वाधारमन्त्री प्रकाश ज्वालाया भूमिकायात कयाः छानविन यायेत निर्देशन बिउगु खः ।

कोरियाली भाषा परीक्षा सम्बन्धी विवादया कारणं शुक्रवाः बालकुमारीइ जूगु प्रदर्शनया इलय् प्रहरीं कयेकूगु गोलीं लानाः निम्ह ल्याय्म्हत सीगु खः । प्रदर्शन जुयाच्वंगु इलय् भौतिक पूर्वाधारमन्त्री प्रकाश ज्वाला अन थ्यंगु खः । उबलय् प्रदर्शनकारीतय्सं मन्त्रीयात गाडीं क्वकयाः गाडी च्याकाबिउगु खः ।

सोमवाः जूगु समितिया बैठकय् उपप्रधान व गृहमन्त्री नारायणकाजी श्रेष्ठ व नेपाल प्रहरीया महानिरीक्षक वसन्तबहादुर कुँवरयाके बयान काःगु खः । बैठक लिपा थ्व घटनायात कयाः श्रम मन्त्री व भौतिक पूर्वाधार मन्त्रीया भूमिका बारे नं छानविन यायेत निर्देशन बिउगु खँ समितिया सभापति रामहरि खतिवडां धयादीगु दु ।

समितिया बैठकय् सहभागी सांसदतय्सं प्रहरी गृहप्रशासनया नियन्त्रणय् मदुगु खः ला धकाः न्ह्यसः तःगु खः । अथेहे सांसदतय्सं सरकारया कमजोरीया कारणं म्वायेगु निंतिं ज्या यायेत विदेश वनेत्यंपिं ल्याय्म्हतय् ज्यान वंगु धासें सरकारं बिउगु क्षतिपूर्ति म्हो जूगु व सीपिनि छेँजःपिंत रोजगारी बीमाःगु खँ ल्ह्वंगु खः ।

लिसलय् गृहमन्त्री नारायणकाजी श्रेष्ठं थ्व घटनाय् सीपिंत थप क्षतिपूर्ति बीत व उमिसं याइगु ज्याया प्रकृति कथं हे वया छेँजःपिंत रोजगारी बीत सरकार प्रतिबद्ध दुगु लिसः बिउगु खः । सरकारं थ्व घटनाय् ज्यान वंपिं निम्हेसिया परिवारयात झिगू झिगू लाख तका दां बीगु घोषणा यायेधुंकूगु दु ।

लिसः बीगु झ्वलय् गृहमन्त्री श्रेष्ठं थ्व घटनाया छानविन यायेत उच्चस्तरीय जाँचबुझ आयोग दयेके धुनागु व आयोगया प्रतिवेदन कथं दोषीपिंत कारवाही जुइ धाःगु खः । थ्व झ्वलय् वय्कलं प्रारम्भिक रुपं छुं अधिकारीतय्त निलम्बन यायेधुनागु नं जानकारी बिउगु खः । गृहमन्त्री श्रेष्ठं घटना अनपेक्षित व दुःखद जूगु धासें दोषी जूपिंत छुं कथंया छुट मबिसे कारवाही जुइ धाःगु खः । वय्कलं धाःगु दु, ‘आयोगं फुक्कं पक्षयात कयाः छानविन याइ । दोषीयात कारवाहीया दायराय् हयेगु जुइ ।’

बैठकय् न्ववासें प्रमुख प्रतिपक्षी दल नेकपा एमालया सांसद रघुजी पन्तं सरकारं आलोचनापाखें बचे जुइगु निंतिं क्वय्या कर्मचारीतय्त निलम्बन यानाः ‘बलिया बोका’ दयेकूगु द्वपं बिउगु खः ।

सांसद पन्तं आः घटनाय् आयोग दयेकाः जक मजिउगु बरु थज्याःगु घटना छु कारणं जुल धयागु सीकेगु निंतिं सामाजिक व आर्थिक कारणत नं मालेमाःगु खँ धाःगु खः । वय्कलं श्रममन्त्री भण्डारीया कार्यशैली नं गलत जूगु धासें वयात नं छानविन यायेत माग याःगु खः ।

अथेहे बैठक पुलांम्ह गृहमन्त्री व राष्ट्रिय स्वतन्त्र पार्टीया सभापति रवि लामिछानें बालकुमारी घटनाय् गृहप्रशासनं निम्ह ल्याय्म्हया हत्या याःगु द्वपं बिउगु दु । ‘न्हापां गोली कयेकूगु खःकि मन्त्रीया गाडी च्याकूगु खः ? थ्व खँय् हे छिकपिनिगु लिसः गोलमटोल दु’ लामिछानें धाःगु खः ।

थ्व झ्वलय् लामिछानें गृहमन्त्री श्रेष्ठं बांलाक ज्या यायेमफुगु धासें न्हापा नं नक्कली भुटानी शरणार्थी प्रकरण व लुँ प्रकरणय् ज्या यानाच्वंपिं प्रहरीया सरुवा यायेगु, प्रहरीयात ज्या याके मबिउगु द्वपं बिउगु खः ।

बैठकय् सांसदतय्सं न्ह्यसः तये न्ह्यः गृहमन्त्री श्रेष्ठ व प्रहरी महानिरीक्षक वसन्तबहादुर कुँवरं घटनाया बारे बयान बिउगु खः । थ्व झ्वलय् गृहमन्त्री श्रेष्ठं सुरक्षा कमजोरीया कारणं घटना जूगु व ईपीएस कार्यालय प्रमुखया भूमिका नं सकारात्मक मजूगु खनेदुगु धकाः धयादीगु खः । प्रारम्भिक कथं स्वयेबलय् फिल्डय् खटे जुयाच्वंपिं प्रहरीया कमान्डर, भौतिक पूर्वाधार मन्त्रीया पिएसओ व इपीएस कार्यालयया प्रमुखया भूमिकाय् कमजोरी खनेदुगु खँ वय्कलं धयादीगु खः ।

उच्चस्तरीय आयोगया कार्यादेशय् छु दु ?
बालकुमारी गोलीकाण्डयात कयाः अनुसन्धान यायेगु निंतिं सोमवाः हे सरकारी उच्चस्तरीय आयोग गठन याःगु खः । सोमवाः च्वंगु मन्त्रिपरिषद्या बैठकं उच्च अदालतया पुलांम्ह न्यायाधीश शेखर पौडेलया संयोजकत्वय् पुलांम्ह एआइजी अरुण बिसी व गृह मन्त्रालयया सहसचिव व प्रवक्ता नारायणप्रसाद भट्टराई दुजः दुगु आयोग गठन याःगु खः । थुगु आयोगयात लछिया कार्यावधि बियातःगु दु ।

मन्त्रिपरिषद्या निर्णय कथं थ्व आयोगं घटनाया मानवीय, भौतिकलगायतया क्षतिया विवरण अध्ययन व विश्लेषण यानाः घटनाया कारण पत्ता लगे यायेगु जिम्मा बियातःगु दु । अथेहे घटनास्थलय् गज्याःगु सुरक्षा प्रबन्ध दुगु व गज्याःगु कमकमजोरी खनेदुगु धयागु सीकेगु जिम्मा नं बिउगु दु । अथेहे घटनालिसे सम्बन्धित व्यक्ति, पदाधिकारी व निकायया भूमिका बारे नं अध्ययन यानाः दोषी खनेदुपिंत कारवाहीया सिफारिस यायेत नं कार्यादेश बियातःगु दु ।