एइबरयात बुकाः बार्साया च्याम्पियन्स लिगया निति वार्मअप
एजेन्सी– ला लिगाय् वंगु चान्हय् जूगु कासाय् एइबरयात २–० गोलं बुकसें बार्सिलोनां वइगु मंगलवाः चेल्सीविरुद्ध जुइगु च्याम्पियन्स लिगया निंतिं वार्मअप याःगु दु ।
ला लिगाय् अपराजित यात्रा न्ह्याकेगु झ्वलय् बार्साया निंतिं लुइस स्वारेज व जोर्डि अल्बां छगू छगू गोल याःगु खः । थ्व विजय लिसें बार्सा ३१ गू कासा म्हितेधुंका ६२ अंक कयाः १० अंकया अग्रता सहित शीर्षस्थानय् दु ।
कासाया झिंखुगूगु मिनेटय् लियोनल मेस्सीया ग्वाहालिं स्वारेजं न्हापांगु गोल याःगु खः । थ्व धुंकाः निगुलिं टिमं आक्रमण याःगु खःसा कासाया अन्तिम पाखे ८८ औं मिनेटय् जक अल्बा गोल यायेत ताःलात । थ्वयां न्ह्यः ६६ औं मिनेटय् एइबरया फाबियन ओरेलाना निगू म्हासुगु कार्ड नयाः मैदानं पिहां वंगु खः । ओरेलानां तम्वं बलयात ल्हातं पञ्च यानाछ्वःगुलिं निगूगु म्हासुगु कार्ड नकूगु खः ।
LEAVE YOUR COMMENTS