चेल्सीयात युरोपा लिग, हजार्डं चेल्सी त्वःतीगु

युरोपा लिगया उपाधि लण्डन क्लब चेल्सीं त्याकूगु दु । अजरबैजानया बाकू शहरय् जूगु लन्डन डर्बीइ चेल्सी आर्सनलयात बुकाः युरोपा लिग च्याम्पियन जूगु खः । बुधवाः जूगु फाइनल कासाय् इडेन हर्जाडया निगू गोलया ग्वाहालिं आर्सनलयात चेल्सीं ४—१ गोलया तःधंगु अन्तर बुकूगु खः । चेल्सीया निंतिं मेगु निगू गोल ओलिभर जिरउड व पेड्रो रोड्रिगेजं याःगु खः ।

आर्सनलया निंतिं छगू जक गोल एलेक्स इओबीं यात ।न्हापागु हाफ गोलरहित बराबरी जूगु कासाया निगूगु हाफय् चेल्सीं आक्रमक कासा म्हितल । कासाया ४९ आंै मिनेटय् ओलिभर जिरउडं गोल यानाः चेल्सीयात अग्रता बिउगु खः । कासाया ६० औं मिनेटय् पेड्रों निगूगु व थ्वयां न्यागू मिनेट लिपा हजार्डं पेनाल्टी गोल यानाः स्वंगू गोलया अग्रता काःगु खः ।

आर्सनलया निंतिं इओबीं ६९ औं मिनेटय् गोल यानाः गोल अन्तर चिब्या याःसां थ्वयां स्वंगू मिनेट लिपा हे हजार्डं व्यक्तिगत निगूगु गोल यानाः हाकनं गोल अन्तर तब्या यानाबिउगु खः । उपाधि त्याकेधुंकाः चेल्सीया २८ दँ दुम्ह कासामि हजार्डं क्लब त्वतेगु संकेत याःगु दु । बेल्जियमया फरवार्ड हजार्ड ‘जिगु बिचारय् गुडबाइ धायेगु ई वल तर फुटबलय् छुं नं धायेफइमखु’ धाःगु खः ।

हजार्डं तःधंगु क्लबं प्रिमियर लिग म्हितेगु म्हगस पूवंगु खँ नं धाःगु खः । चेल्सीया प्रशिक्षक माउरिजओ सारीं हजार्डं क्लब त्वतेत्यंगु बारे थःम्हं सिउगु व वयागु निणर्ययात सम्मान यायेगु खँ धयादीगुु दु । सारीं हजार्ड छम्ह उत्कृष्ट कासामि जूगु व थःम्हं हजार्डयात बांलाक थुइकेत निला स्वला ई काःगु खँ नं धाःगु खः । हजार्ड न्हय्दँ न्ह्यः लिलें चेल्सी वःगु खः । चेल्सीया निंतिं हजार्डं ३५२ कासा म्हिताः ११० गोल याःगु दु । हजार्ड आः रियल म्याड्रिड वनीगु सम्भावना दु ।