ने. सं. ११४४ कौलाथ्व षष्ठी -

सक्व सांस्कृतिक संरक्षित क्षेत्र प्रस्तावित ऐन लःल्हात

सक्व (नेपालभाषा टाइम्स)- नेवाःतय्गु पुलांगु बस्ती सक्वयात सांस्कृतिक संरक्षित क्षेत्र घोषणा यायेगु निंतिं माःगु कथंया प्रतिवेदन नापं प्रस्तावित ऐन शंखरापुर नगरपालिकाया मेयर रमेश नापितयात लःल्हाःगु दु । नगरपालिकां दयेकूगु कार्यदलया कजि गोविन्द प्रसाद श्रेष्ठं मेयर नापितयात शनिवाः उगु प्रतिवेदन व प्रस्तावित ऐन लःल्हानादीगु खः । कजि श्रेष्ठ म्हं मफुगुलिं वय्कःया हे छेँय् छगू ज्याझ्वः यासें मेयर नापितयात लःल्हायेगु ज्या याःगु खः ।

थुगु कार्यदलय् कजि गोविन्द प्रसाद श्रेष्ठ, ल्यू कजि प्रकाशमान श्रेष्ठ, दुजः तिलकमानन्द बज्राचार्य, द्वारिकानाथ श्रेष्ठ, जनक नारायण श्रेष्ठ, प्रविणमान सिं, प्रतिभाव श्रेष्ठ, कृष्णदेवी कारंजित, तुलाराम लामा, चन्द्र नारायण श्रेष्ठ, जीवनलाल श्रेष्ठ, कानुनी सल्लाहकार शिवप्रसाद श्रेष्ठ, सल्लाहकार श्रीकृष्ण महर्जन ‘नेवाः’, सदस्य सचिव रवि शर्मा दी । अथेहे सक्वया निम्ह वडा अध्यक्षपिं राधाकृष्ण श्रेष्ठ व विष्णु प्रसाद श्रेष्ठ नगर समन्वयया निंतिं कार्यदलय् च्वनादीगु खः । कार्यदलय् दुथ्याःपिं सकलं सक्व नगरया स्थानीयवासी खःसा सदस्य सचिव नगरपालिकाया कर्मचारी व सल्लाहकार श्रीकृष्ण महर्जन किपूयाम्ह खः ।

थुगु कार्यदलं सक्वया मूर्त अमूर्त सांस्कृतिक, प्रथाजनीत संस्था गुथि, दाफा खलः, अनया नेवाः दुनेया थरतय्गु बारे ब्यापक अध्ययन यानाः प्रतिवेदन तयार याःगु खः ।

उगु हे प्रतिवेदनया आधारय् सक्व सांस्कृतिक संरक्षित क्षेत्र सम्वन्धि प्रस्तावित ऐन तयार यानाः लःल्हाःगु दु । उगु ऐनय् सक्वया गुलि नं नेवाः दुनेया थरत दु इमिगु गुथिनिसें त्वाःपाखें प्रतिनिधित्व जुइ कथं समानुपातिक समवोशी प्रतिनिधित्व याकाः निर्माण जुइगु समिति बैधानिक समिति जुइगु खँ उल्लेख यानातःगु दु ।

सक्वया निंतिं तयार जूगु उगु प्रतिवेदन व ऐनयात आः वइगु असारं जुइगु नगरसभाय् यंकाः पारित यानाः कार्यान्वन यायेगु जुइ धकाः मेयर नापितं धयादिल । अथेहे प्रतिवेदनयात शंखरापुर नगरपालिकाया दस्तावेजया रुपय् नाला कायेगु खँ नं धयादिल । अथेहे शंखरापुर नगरपालिकाया प्रवक्ता नापं वडा अध्यक्ष राधाकृष्ण श्रेष्ठं ऐतिहासिक सक्वया थाय् बाय्या प्राचिन नां तयेगु ज्या याना, नेवाः भासं व तामाङ भासं आखः ब्वंकेगु नितिं पाठ्य पुस्तक तयार जुयाच्वंगु खँ कनादिसें आः सक्वयात सांस्कृतिक संरक्षित क्षेत्र कथं न्ह्यःने यंके धुंकाः तामाङतय्गु नं सांस्कृतिक संरक्षित क्षेत्र दयेका वनेगु जुइ धयादिल ।