नेवाः प्रतिष्ठान गठन यायेत माग
येँ (नेपालभाषा टाइम्स)- नेवाः मुक्ति मोर्चां बागमति प्रदेशय् नेवाः प्रतिष्ठान गठन यायेगु माग सहित झिंन्हय्गू थीथी माग व सुझाव तयाः बागमति प्रदेशया मुख्यमन्त्री शालिकराम जम्कट्टेलयात ज्ञापनपत्र लःल्हाःगु दु । ज्ञापनपत्रय् नेवाः सभ्यताया अध्ययन अनुसन्धानया निंतिं प्रदेश सरकार मातहत नेवाः प्रतिष्ठान गठन यायेत इनाप यानातःगु खः ।
अथेहे ज्ञापनपत्रय् नेवाःतय् परम्परागत ज्ञान, प्रविधि, शीप, हस्तकला, भाषा, कला साहित्य संस्कृति आदिया संरक्षण व विकासया निंतिं महाविद्यालय वा कलेज स्थापना यायेमागु खँ नं न्हयथनातःगु दु । नेवाः मुक्ति मोर्चाया अध्यक्ष दिलिप महर्जन व महासचिव देवेन्द्र श्रेष्ठलिसें वंगु प्रतिनिधि मण्डलं मुख्यमन्त्री जम्कट्टेलयात नापलासें थ्व ज्ञापनपत्र ल ःल्हाःगु खः ।
उगु ज्ञापनपत्रय् ‘मुख्यमन्त्री नेवाः सम्पदा, भाषा तथा संस्कृति संरक्षण कोष’या व्यवस्था यायेमाःगु, नेवाःतय् बस्ती दुने नेवाः म्हसिका कथंया छेँ, फल्चा, सतः, देगः, चैत्य, विहार, चुकतय् पुनःनिर्माण यानाः प्राचीन बस्तीया पूर्वाधार दयेकेगु ज्या न्ह्याकेमाःगु सुझाव नं बियातःगु दु ।
अथेहे नेवाः सम्पदा–पुरातात्विक ढंगं छेँ दयेकूपिंत थीथी तहया सरकारं प्रोत्साहन कथं अनुदान बीमाःगु, देय्या विकासया निंतिं योगदान बियादीपिं नेवाः व्यक्तित्वय् सम्मानय् पार्क दयेकेगु लिसें परम्परागत ज्ञान, प्रविधि, संस्कृति, परम्परा, रीतिरिवाज, नखःचखः व मौलिकता दुथ्याःगु नेवाः संग्रहकालय् चायेकेमाःगु खँ नं उकी न्ह्यथनातःगु दु ।
अथेहे स्थानीय सरकार संचालन ऐनय् सांस्कृतिक संरक्षण क्षेत्र घोषणा यायेदइगु व उकिया निंतिं विशेष योजना व बजेटया व्यवस्था यायेफइगु व्यवस्था दुगुलिं थुगु ज्या न्ह्याकेत छगू अध्ययन कार्यदल गठन यायेत नं नेवाः मुक्ति मोर्चां माग याःगु दु ।
अथेहे प्रदेश सरकारं कार्यान्वयनय् हयेत्यंगु भाषा सम्बन्धी व्यवस्था यायेत दयेकूगु ऐन २०८० लागु जुइगु चरणय् थ्यंगुलिं थ्वयां न्ह्यः हे ऐनया व्यवस्था कथं विज्ञ पुचः गठन यायेत नं मुख्यमन्त्री जम्कट्टेलया ध्यानकर्षण नं याःगु दु ।
LEAVE YOUR COMMENTS