थुकथं न्ह्यात बोडेया म्ये प्वाः खनीगु जात्रा
थिमि (रासस)÷ वैशाख २ गते आइतवाः सुथय् थिमिइ सिन्दुर जात्रा जुयाच्वंगु हे झ्वलय् न्हिनय् बोडेय् म्येप्वाः तियाः जात्रा जुल । बोडेया पाँचो गणेद्यःयाथासं सुरु जुइगु थुगु जात्राया निंतिं थुगुसी सुजन बाग श्रेष्ठं म्ये प्वाः खनादीगु दु ।
न्हिनय् १ बजे पाखे थीथी द्यः चाःहिलाः पाँचो गणेद्यःयाथाय् थ्यंम्ह २८ दँया श्रेष्ठं अन नं द्यः चाःहिले धुंकाः गणेद्यःया देगः न्ह्यःने च्वंगु फल्चाय् दयेकातःगु दबुलिइ थहां झाल । अन वय्कःया लिसें झिंनिक्वः तक म्ये प्वाः खनेधुंकूम्ह कृष्णचन्द्र बाग श्रेष्ठ, नायः पःमाः जलकृष्ण पिला श्रेष्ठ, मेम्ह पःमा माइला भासिको श्रेष्ठ व थ्वयां न्ह्यः च्याक्वः तक म्ये प्वाः खनेधुंकूम्ह जुजुभाइ बाग श्रेष्ठ नं मञ्चय् थहां झाल । म्ये प्वाः खनेत तयार जुयादीम्ह सुजनया तःबाः कृष्णचन्द्र जःखः च्वंपिं द्यःपिंत पुज्यानाः मत बीवं लछि न्ह्यवनिसें तयार यानाः चिकनय् थुनातःगु १० इञ्चया ताःहाकःगु नया नतुलिं न्हिनय् २ः३५ बजे पाखे द्वलंद्वः मनूतय् न्ह्यःने म्ये प्वाः खनाबिउगु खः ।
थ्व लिपा सुजनं सकसितं नमस्कार यानाः चन्द्राकारया भ्वाय् (महाद्वीप) ब्वहलय् तयाः क्वबियाः घौछि धयाथें देय् चाःहिलाः थीथी द्यःयाथाय् वनाः पुज्यानादीगु खः । थ्व लिपा भाँगु त्वालय् थ्यंकाः महालक्ष्मी द्यःयात न्याक्वः तक चाःहिले धुंकाः भ्वाय्यात देगः पिने तयाः वय्कः देगलय् दुहां वनाः म्येय् तियातःगु नतूचा लिकयाः देगःया अंगलय् च्वंगु सिँइ तानाबिउगु खः । थथे नतूचा तायेधुंकाः जात्रा क्वचाःगु खः ।
चैत मसान्तय् बोडेया महालक्ष्मी देगः न्ह्यःने यःसिं थनेवं म्ये प्वाः खनीम्हेसिनं निराहार व्रत च्वने माः । म्ये प्वाः खनेगु जात्रा क्वचायेवं महालक्ष्मी देगलय् च्वंगु चा कयाः म्येँ प्वाः खंम्हेसिनं नासःद्यःया पुजा याइ । म्ये प्वाः खनाः प्वाःगंगु म्येय् महालक्ष्मी देगलय् च्वंगु चां बुल वासः हे तयेम्वायेक घा लनावनी धयागु मान्यता दुगु खँ स्थानीय दीलकृष्ण प्रजापतिं कनादिल ।
जात्राया किंवदन्ती कथं प्राचीनकालय् बोडेया नीलबाराहीया जःखः च्वंपिं भूत प्रेत पिशाच, ख्याःतय्सं बोडेया मनूतय्त यक्व हे दुःख बीगु यायेवं तान्त्रिक भीमदत्त कर्माचार्यं तान्त्रिक विद्यां तारण तयाः ज्वनाः सँ चनाः ताःहाकःगु मुलु जबर्जस्ती म्ये प्वाःखनाः बिसिउँ वने मफयेमा धकाः तुतिं घंघला न्ह्याकाः झ्यातूगु सिँया महाद्वीप क्वबिकाः बोडे चाःहिकूगु धयागु मान्यता दु । थःत बिउगु कसा सह यायेमफयाः पिशाचं थःत त्वःताबिल धाःसा धाःसा पुरे यानाबी धकाः बचं ल्हायेवं तान्त्रिक भीमदत्तं आवंलि बोडेय् दुःख बिउ मवयेगु, बोडय् रोगब्याधी, अनिकाल, अनावृष्टि, अतिवृष्टि जुइके मबिइगु, धर्मया चेष्टा थकायेगु व बोडेवासीतय्सं धाःकथं न्हय्दँय् छकः वयाः म्ये प्वाः खंकः वयेमाःगु बचं ल्हाः त्वःताबिल ।
छन्हु म्हगसय् नीलबाराहीं थः द्वारपालयात अपमानित याःगु धासें तान्त्रिक भीमदत्तयात बाँकी तयेमखु धकाः तं प्वंकल । अले भीमदत्तं क्षमा पुजा यात । उकिं आःतक नं म्ये प्वाः खनेन्ह्यः क्षमा पुजा यायेगु चलन दु ।
तर थ्व किंवदन्तीयात धाःसा गुक्वः तक म्ये प्वाः खनादीम्ह बुद्धकृष्ण धाःसा मखुगु खँ धयादी । वय्कःया कथं थ्व जात्रा नीलबाराहीया प्रतिष्ठालिसे हे स्वाःगु जात्रा खः । म्ये प्वाः खनीम्ह सुं भूत, पिसाच मखु, नीलबाराहीया द्यःगण खः । ‘म्ये प्वाः खनीम्हेसित ख्याः वा राक्षसलिसे स्वानाः भ्रम न्यंकेमजिउगु खँ वय्कलं धयादी । ‘म्ये प्वाः खनीम्ह ख्याः वा राक्षस मखु, देवगण खः धयागु खँ सकसिनं थुइकेमाः’ वय्कलं धयादीगु दु ।
LEAVE YOUR COMMENTS