मेसीया पेनाल्टि असफल जुइवं अर्जेन्टिना बराबरीइ

येँ– लियोनल मेसीं पेनाल्टिइ गोल यायेमफयेवं अर्जेन्टिना विश्वकपया थःगु न्हापांगु कासाय् नकतिनि विश्वकपय् डेब्यु याःगु आइसल्यान्डलिसे बराबरीइ चित्त बुझे यायेमाःगु दु ।

कासाया ६४ औ मिनेटय् सर्जियो अग्युरोयात आइसल्यान्डया होर्डुर माग्नुसनं बक्सय् क्वःदयेकेवं अर्जेन्टिनायात पेनाल्टि वःगु खः । तर थुगुसी विश्वकप त्याकेमाःगु दबाबय् लानाच्वंम्ह मेसीं थ्वाःगु पेनाल्टि हान्नेस हल्डोर्सनं पनाबिल ।
थ्वयां न्ह्यः अग्युरों हे अर्जेन्टिनाया निंतिं कासाया १९ औं मिनेटय् न्हापांगु गोल याःगु खः । तर अग्युरो गोल याःगु निगू मिनेट लिपा हे अल्फ्रेड

फिनबोग्सनं गोल यासें कासा बराबरीइ हःगु खः ।
लिपांगु हाफय् निक्वःतकया बिजेता अर्जेन्टिनां तःगू हे आक्रमण याःगु खःसा मुक्कं स्वंगूत्या लाख जनसंख्या दुगु चिकिचाधंगु देय् आइसल्यान्डया विश्वकपय् डेब्यु याःवःगु टिमया कासामितय् जुझारुपनया न्ह्यःने छुं यायेमफुत ।

थ्व बराबरीं न्हापांगु कासाय् अर्जेन्टिनां आइसल्यान्डलिसे १ –१ अंक इना कायेमाःगु दु ।