केएनकेया ग्राजुएन ज्याझ्वः

येँ(नेपालभाषा टाइम्स)- येँया खुसिबुँइ च्वंगु काठमाडौं नेवाः किन्डरगार्टेन (केएनके)या युकेजी तगिमय् ब्वनाच्वंपिं मस्तय् ग्राजुएन ज्याझ्वः वंगु आइतवाः जुल । जमःस्थित राष्ट्रिय नाचघरय् उगु ज्याझ्वः जूगु खः ।

केएनकेया निर्देशक राजेन्द्र महर्जनया सभापतित्वय् जूगु ज्याझ्वलय् मूपाहांकथं नेपालभाषाया नांजाःम्ह कवि रजनी मिला महर्जन झायादीगु खः । मूपाहां कवि महर्जनं त्वाःदेवाय् मत च्याकाः उलेज्या यानादीगु ज्याझ्वलय् ब्वनेकुथिया हे युकेजी तगिमय् ब्वनाच्वंम्ह सम्राट वैद्यं लसकुस यानादीगु खः । उगु इलय् युकेजी तगिया ब्वँमि मस्तय्त मूपाहां महर्जनं दसिपौ व निर्देशक महर्जनं मतिनाया चिं लःल्हानादीगु खः ।

ज्याझ्वलय् केएनकेया युकेजी तगिमय् ब्वनाच्वंपिं मस्तय् अभिभावकपिं अञ्जली महर्जन व प्रभात कक्षपतिं नुगःखँ तयादीगु खःसा नर्सरी, एलकेजी व युकेजी तगिमय् ब्वनाच्वंपिं नच्चापिं ब्वँमिमस्तय्सं चचा प्याखं, नेपालभाषा व अंग्रेजी नापं राष्ट्रिय म्येँय् हुलाप्याखं मांभाय् शिक्षाया महत्वया बारे नाटक नं क्यंगु खः ।

ज्याझ्वलय् विशेष पाहांकथं केएनकेया प्रिन्सिपल रविन महर्जन, संकिपा निर्देशक रवि साय्मि, संचारकःमि उदेन न्हूसाय्मि झायादीगु खः ।