किम लिसेया वार्ताया ई व थाय् क्वःछीधुनागु दु ः ट्रम्प

अमेरिकी राष्ट्रपति डोनाल्ड ट्रम्पं उत्तर कोरियाली नेता किम जङ अनयात नापलाये न्ह्यः दक्षिण कोरियाया राष्ट्र पति मुन जे इनयात निं नापलाइगु जूगु दु । राष्ट्रपति ट्रम्प व वय्कःया समकक्षी मून दथुइ वइगु मे २२ य् ह्वाइट हाउसय् सहलह जुइत्यंगु दु ।
ट्रम्म व किम दथुइ थ्व हे मे महिनाया अन्त वा जूनया सुरुपाखे वार्ता जुइत्यंगु दु ।

ट्रम्पं उत्तर कोरियाली नापालायेगु ई व थाय् क्वःछीधुनागु धाःसां थ्व बारे थप विवरण धाःसा बियामदीनि ।वय्कलं थ्व बारे अमेरिकां प्योङयाङलिसे विस्तृत खँ ल्हानाच्वंगु व उत्तर कोरियाया हिरासतय् दुपिं अमेरिकी नागरिकतय् बारे नं विस्तृत सहलह जुयाच्वंगु खँ धयादीगु दु ।

शुक्रवाः ह्वाइट हाउसय् अमेरिकी पत्रकारतलिसे खँ ल्हासें ट्रम्पं किमयात नापलायेगु तिथि व थाय् क्वःछीधुनागु व थुकिया घोषणा याकनं हे जुइ धयादीगु खः ।किमलिसे जुइगु बैठकया विषयय् सहलह यायेत ट्रम्पं दक्षिण कोरियाली राष्ट्रपतियात नापलायेत्यंगु खः ।ट्रम्प व किम दथुइ शिखर वार्ता जुइ न्ह्यः उत्तर कोरियाय् कुनातःपिं स्वम्ह अमेरिकी नागरिकतय्त त्वःतेगु बारे नं सहलह जुयाच्वंगु खँ धाःगु दु ।

थ्व हे दथुइ उत्तर कोरियां दक्षिण कोरिया लिसे ई मिले यायेत थःगु देय्या इलय् हिउपाः हःगु दु । उत्तरं शुक्रवाः बहनी साढे ११ बजेयात ३० मिनेट न्ह्यःने हयाः १२ बजे याःगु दु । थुकियात वंगु वालय् निगू कोरिया दथुइ जूगु शिखर वार्ता लिपा जूगु न्हापांगु व्यावहारिक पलाः जूगु खँ धाःगु दु ।