मिस्तय्त लं त्वकाः जाँच याःगु मामिलाय् कतारं माफि फ्वन

एजेन्सी – कतारं थःगु अन्तर्राष्ट्रिय विमानस्थलय् मिसापिं यात्रीतय्त आपत्तिजनक कथं जाँच यायेमाःगु खँय् माफी फ्वंगथु दु। वंगु अक्टोवर २ तारिखय् दोहाय् च्वंगु विमानस्थलय् छम्ह ह्याउँमचायात फोहर वांछ्वयेगु बाल्टिनय् वांछ्वयातःगु लुइवं विमानस्थलय् दुपिं सकलें मिस्तय्गु जाँच याःगु खः ।

थ्व जाँच यायेगु झ्वलय् मिस्तय्त एम्बुलेन्सय् तया यंकाः अन्डरवेयर तकं त्वकाः जाँच याःगु खः । उबलय् विमानय् थ्यनाच्वंपिं झिगू उडानया मिस्तय्त जाँच याःगु झ्वलय् झिंच्याम्ह अस्ट्रेलियाया नागरिकत लाःगु खः । थ्व जाँचया कारणं गुलिखे मिस्त ग्याःगु व निराश जूगु खनेदुगु खँ प्रत्यक्षदर्शीतय्सं धाःगु दु ।

अस्ट्रेलियाया सरकारं उबलय् उमिगु मनोबल कुहां मवनेमा धकाः ग्वाहालि तकं यायेमाःगु खँ धाःगु दु। मिस्तय्त वसः त्वकाः याःगु जाँचयात कयाः विवाद तच्वया वयेवं कतार सरकारं छगू वक्तव्य पिथँसें माफी फ्वंगु खः । वक्तव्यय् मचा वांछ्वयाथकूम्ह अपराधी बिसिउँ वनेमफयेमा धकाः तुरुन्त जाँच यायेमाःगु खँ धयातःगु दु। कतार सरकारं मांम्हेसित ज्वने धुनागु व मज्वंनीगु खँ स्पष्ट मयाःनिसां मचाया स्वास्थ्य बांलाःगु खँ धाःगु दु ।

सम्बन्धित बुखँ

LEAVE YOUR COMMENTS