उत्तर कोरियाया क्षेप्यास्त्र परिक्षण असफल – दक्षिण कोरिया

एजेन्सी÷ उत्तर कोरियां बुधवाः सुथय् याःगु क्षेप्यास्त्रया परिक्षण असफल जूगु दक्षिण कोरियाया दावी याःगु दु । दक्षिण कोरियाया समचार संस्था एन के न्यूजं बिउगु जानकारीकथं उत्तर कोरियां परीक्षणया निंतिं कयेकूगु क्षेप्यास्त्र राजधानी प्योङयाङं पिने कुतुंवंगु खः ।

दक्षिण कोरियाया सेनां विज्ञप्ति मार्फत क्षेप्यास्त्र परिक्षण असफल जूगु खँ धाःगु खः । ‘उत्तर कोरियां सुनान लागां बुधवाः सुथसिया ९ः३० ताः इलय् क्षेप्यास्त्र प्रहार याःगु खः तर थुगु क्षेप्यास्त्र असफल जूगु खनेदु’ विज्ञप्ति धयातःगु दु ।

एनके न्यूजं धाःकथं उत्तर कोरियाया राजधानी प्योङयाङय् क्षेप्यास्त्र मूगु सः तसक तापाक थ्यंक तायेदुगु खःसा सर्गतय् नं ह्याउँगु कँु खनेदुगु खः । न्युक्लियर पोलिस प्रोग्राम अंकित पान्डा परीक्षण असफल जूगु व राजधानीइ खनेदुगु ह्याउगु कुँ मनूतय्गु निंतिं ग्यानापुसे च्वंगु धाःगु दु । उत्तर कोरियां थुगु दँय् जक गुक्व क्षेप्यास्त्र परीक्षण यायेधुंकूगु दु । उकी मध्ये छगू अन्तर महादेशीय क्षेप्यास्त्र जूगु अमेरिकाया दाबी दु ।