कर प्रणालीइ सुधारया निंतिं प्रक्रिया सुरु
येँ – सरकारं कर प्रणालीइ सुधार व करया दायरा विस्तारया लागि माःगु प्रक्रिया सुरु याःगु दु । राजश्व नीति निर्माण तथा वित्तीय सुधार, कर सम्बन्धी कानुनय् ई कथं हिउपाः हयेमाःगु, करया दरया पुनरावलोकन, राजश्व प्रशासनया संगठन संरचना लगायतया विषयय् दुथ्याकाः प्रक्रिया न्ह्याकूगु खः ।
राजश्व परामर्श समितिया बैठकपाखें झिगू विषयगत समिति गठन यानाः माःगु ज्या सुरु जूगु खँ अर्थ मन्त्रालयं धाःगु दु । मन्त्रालयं अर्थ व्यवस्थाया समग्र पक्षया अध्ययन व विश्लेषण यानाः सरकारया वार्षिक नीति व कार्यक्रम व बजेट वक्तव्यय् दुथ्याकेमाःगु राजश्व नीति निर्माण व वित्तीय प्रणालीइ सुधारया बुुँदा तयाः उगु समिति मातहत दइकथं झिगू विषयगत उपसमिति गठन याःगु खः ।
निजी ख्यःया नं सहभागिताय् सरकार व निजी ख्यः दथुइ नीति संवाद संयन्त्रया रुपय् थुगु समितियात काइ । समितिइ झिंन्याम्ह दुजः दु । समितिया आयतवाःया बैठकं थीथी झिगू विषयगत समिति गठन नं याःगु खँ अर्थ मन्त्रालयं धाःगु दु । समितिं विषयगत उपसमितिया कार्यविवरण व मार्गनिर्देशन नं निर्धारण याःगु दु । न्हय्गुलिं प्रदेशया राजधानीइ अन्तक्र्रिया व सहलह ज्याझ्वः नं याइगु जूगु दु ।
मन्त्रालयया कथं त्रिभुवन विश्वविद्यालय केन्द्रीय अर्थशास्त्र विभागया प्रमुख, नेपाल उद्योग वाणिज्य महासंघ, नेपाल उद्योग परिसंघ, नेपाल चम्बर अफ कमर्स, नेपाल राष्ट्रिय उद्योग व्यापार संगठन, नेपाल समुद्रपार निकासी पैठारी संघया प्रतिनिधि बैठकय् दुथ्याः ।
अथेहे विज्ञ दुजलय् डा. चन्द्रमणि अधिकारी व मदनकृष्ण शर्मा दुथ्यानाच्वंगु दु । समितिया संयोजक व मन्त्रालयया राजश्व सचिव लालशंकर घिमिरें उपसमितिं प्रतिवेदन पेश यायेबलय् सुझावयात तत्कालिन, मध्यकालिन व दीर्घकालिन ढाँचाय् न्ह्यब्वयेगु व सुझाव कार्यान्वयनया खाका समेत सिफारिस यायेत निर्देशन बियादीगु खँ अर्थ मन्त्रालयं धाःगु दु ।
LEAVE YOUR COMMENTS