कालिगण्डकी गर्जया लाइसेन्स बीगु तयारी
येँ – सरकारं १६४ मेगावाटया कालिगण्डकी गर्ज जलविद्युत आयोजना दयेकेगु निंतिं कालिगण्डकी गर्ज हाइड्रोपावर प्राइभेट लिमिटेडयात मत उत्पादन लाइसेन्स बीगु प्रक्रिया न्ह्याकूगु दु । आयोजन चिनियाँ लगानीइ दयेकेगु खँ धाःगु दु । प्रधानमन्त्री केपी शर्मा ओलीया चीन भ्रमणया झ्वलय् प्रवद्र्धक हाइड्रो सोलुसनया सञ्चालक ज्ञानेन्द्रलाल प्रधान व युनाङ सिङ हवा वाटर कन्जरभेसन एण्ड हाइड्रो पावरया प्रतिनिधि दथुइ लगानी सम्बन्धी सम्झौता पत्रय् हस्ताक्षर जूगु खः ।
आयोजनाया लाइसेन्स बीत विद्युत विकास विभागं ३५ न्हुया सुचं पिकाःगु दु । आयोजनापाखें प्रतिकूल लिच्वः लाइगु खनेदुसा लिखित राय सुझाव बीत नं विभागं सर्वसाधारणयात इनाप याःगु दु । कालिगण्डकी गर्ज हाइड्रोपावरं सुइन्यान्हु लिपा मत उत्पादनया लाइसेन्स कायेदइ ।
ज्या शुरु जूगु न्यादँ लिपा आयोजनापाखें मत उत्पादन जुइगु खँ कम्पनीं धाःगु दु ।
आयोजनापाखें दँय् ८३ करोड १० लाख युनिट मत उत्पादन जुइगु सम्भाव्यता अध्ययनं क्यंगु दु । लिसें आयोजना दयेकेगु निंतिं २५ अर्ब तक खर्च जुइगु अनुमान यानातःगु दु । आयोजनाया वातावरणी प्रभाव मुल्यांकन (ईआईए) स्वीकृति कायेगु झ्वलय् दुगु खँ धाःगु दु । आयोजनां उत्पादन जूगु मत न्यायेगु निंतिं कम्पनी नेपाल विद्युत प्राधिकरणयात प्रस्ताव तःगु दु ।
कालिडण्डकी खुसिं मत उत्पादन यायेगु आज्जु कथं वि.सं. २०६३ सालय् आयोजनाया सर्वेक्षण जूगु खः । वि.सं. २०६८ पुस १९ गते उत्पादन अनुमतिया निंतिं विद्युत विकास विभागय् निवेदन बिउगु खःसा आयोजनां प्रक्रिया पूमवंकूगुलिं लाइसेन्स हे रद्द जूगु खः । पुलांगु लाइसेन्स रद्द जुइधुंकाः नेपाल कालिगण्डक गर्ज नामं पुलांगु हे कम्पनीं आयोजनाया हाकनं सर्वेक्षण यानाः ज्या न्ह्याकूगु खः । कम्पनीं आयोजनाया विद्युत गृह व आवास क्षेत्रया निंतिं ३ सय रोपनी जग्गा न्यायेधुंकूगु दु ।
LEAVE YOUR COMMENTS