ने. सं. ११४४ कौलाथ्व पारू - नःलास्वनेगु

भ्याट छुट बीमजिउगु विज्ञतय् धापु

सरकारं कापः उद्योगतय्त बिया वयाच्वंगु छुट लित कायेवं उद्योगीत आन्दोलनय् कुहां वयाच्वंगु इलय् सरकारी अधिकारी व विज्ञतय्सं धाःसा भ्याट लित बियां जक कापः उद्योग च्वन्ह्याः वनीमखुगु खँ धाःगु दु । चालु आर्थिक दँया बजेटपाखें कापः उद्योगतय्त बिया वयाच्वंगु भ्याट लित बीगु सुविधा चिइकेवं कापः कारखाना हे बन्द यानाः उद्यमीत आन्दोलनय् कुहां वयाच्वंगु दु । कापः उद्यमीतय्सं अर्थमन्त्री युवाज खतिवडायात नापलानाः थःपिंत न्हापांनिसें बिया वयाच्वंगु सुविधा कायम हे यायेत माग याःगु दु ।

सरकारं धाःसा भ्याट लित बीगु सुविधाया दुरुपयोग जूगु धासें बजेट मार्फत हे थ्व सुविधा चिइकूगु खः । कापःया लिसें चिनी, चिकं, छुचुं, वनस्पति घ्यः व मोबाइल फोन आयातकर्तातय्त सरकारं थ्व सुविधा बिया वयाच्वंगु खः । तर थ्व सुविधां दँय् न्यागू अर्ब स्वयां अप्वः राजश्व छुट बीमालाच्वंगु धासें बजेट मार्फत हे थुगुसी निसें थज्याःगु व्यवस्था चिइकूगु खः ।

कापः व्यवसायीतय्सं धाःसा थःपिंत बियातःगु सुविधा लित कायेवं स्वदेशी उत्पादनया लागत अप्वःगु व थुकिं यानाः विदेशं आयात जुइगु वसःयात जक फाइदा जूवंगु धासें विरोध प्वंकाच्वंगु खः । नेपाल कपडा उद्योग संघया अध्यक्ष शैलेन्द्रलाल प्रधानं नीदँ न्ह्यव निसें थज्याःगु हे समस्या जुयाः उकियात सम्बोधन यायेत भ्याट समायोजनया व्यवस्था जूगु धासें आः नं थःपिनिगु माग थ्वहे जूगु खँ धयादीगु दु ।

नेपालय् थौंकन्हय् निसः व न्यय्गू धयाथें कापः उद्योग संचालनय् वयाच्वंगु दु । ५० हजार स्वयां अप्वःसित रोजगार बिया वयाच्वंगु कापः उद्योगं दँय् २० करोड मिटर कापः उत्पादन याना वयाच्वंगु दु । अथे खःसां विदेशपाखें वइगु कापःलिसे प्रतिस्पर्धा याये मफुगुलिं क्षमता स्वयां बछि जक उत्पादन जुयाच्वंगु खँ धाःगु दु । कापः व्यवसायीतय्सं न्हापा ४० निसें शत प्रतिशत तक भ्याट लित कायेगु याना वयाच्वंगु खः ।
मेखे अर्थविद्तय्सं धाःसा कर छुट बियां जक उद्योग थहां वने फइमखु धयाहःगु दु । उमिसं भ्याट छुटं उपभोक्तातय्सं वस्तु व सेवाया निंतिं पूगु १३ प्रतिशत व्यवसायीतय् ल्हातय् वनाच्वंगु धाःसें छुट नीति हे गलत खः धकाः धयावयाच्वंगु दु ।

पुलांम्ह अर्थसचिव शान्तराज सुवेदीं बिबिसीलिसे खँ ल्हासें धाःगु दु, ‘कर छुटं जक उद्योग बल्लाइ धयागु जुइमखु । उकिया पलेसा बरु पूर्वाधार विकास, मेसिन आयात व कच्चा पदार्थय् भन्सार छुट यायेमाः । उकिं जक कापः उद्योगयात सबल याइ ।’

मेखे आन्तरिक राजश्व विभागं नं कापः उद्योगीतय्त भ्याट लित बीगु पलेसा मेमेगु सुविधा बियागु खँ धाःगु दु । राजश्व विभागया महानिर्देशक विष्णुप्रसाद नेपालं कापः उद्योगयात आयकरय् ५० प्रतिशत छुट बियागु दु धासें भ्याट हे लित माल धकाः धायेगु खँ िमले मजू धयादीगु दु । महालेखा परीक्षकया ज्याकुथिं दँय्दसं धयाथें भ्याट लित बीगु प्रावधान चिइकेत सुझाव बिया वयाच्वंगु खः । थ्व हे सुझाव कथं थुगुसी बजेटं हे भ्याट छुट बीगु प्रावधान चिइकूगु खः ।