रसुवाया टिमुरेय् सुख्खा बन्दरगाह दयेकेगु सुरु

येँ – नेपाःया उत्तरी नाका रसुवागढीया टिमुरेय् सुक्खा बन्दरगाह दयेकेगु सुरु जूगु दु । वैदेशिक व्यापारयात सहजीकरण यायेगु ताः तयाः बन्दरगाह दयेकेगु सुरु याःगु खः । थ्व बन्दरगाह निदँत्या दुन दयेके क्वचायेकेगु लक्ष्य तयातःगु दु । बन्दरगाह दयेकेगु जिम्मा तिब्बेत फुली कन्स्ट्रक्सन गु्रप कम्पनीयात लाःगु दु ।

नेपाल इन्टरमोडेल यातायात विकास समिति व कम्पनी दथुइ वंगु वैशाख २९ गते सुख्खा बन्दरगाह दयेकेगु सम्बन्धय् समझदारी पत्रय् हस्ताक्षर जूगु खः । बन्दरगाह थ्यंमथ्यं निगू अर्ब तकाया लगातय् दयेकेत्यंगु खः । थुकिया निंतिं चीन सरकारं आर्थिक ग्वाहालि याःगु खः ।

८.५ दशमलब ५ हेक्टर क्षेत्रफलय् दयेकीगु थ्व बन्दगाहय् मू भवन सहित भन्सार, क्वारेन्टाइन, बैंक, ल्याब, सुरक्षा निकायया ज्याकू दइ । थन छक्वलं स्वसःगलं मल्याक ट्रक कन्टेनर पार्किङ यायेफइगु खँ धाःगु दु ।

‘चीनलिसे व्यापार विस्तारया निंतिं रसुवा आः सरकारया प्राथमिकताय् लानाच्वंगु दु’ नेपाल इन्टरमोडेल यातायात विकास समितिया प्राविधिक इन्जिनीयर प्रमोद आचार्यं धयादिल । चीन सरकारया ग्वाहालि अन्तर्गत टिमुरेगां क्वय् भोटेकोशी खुसिया तटीय क्षेत्र व लिक्कसं लाःगु पाखा बुँ नं उपयोग यानाः थ्व बन्दरगाह दयेकेतयंगु खः ।