चीनया नाका चायेकूसां सामान हये अःपू मजू

येँ – सरकारं चीन नाप स्वाःगु निगू नाका तातोपानी व रसुवागढीया नाका चायेकेगु धाःसां नं उलि अपू मजूगु खँ सीदुगु दु । सरकारं रसुवा नाका चायेकाः अन थानाच्वंगु व्यापारीतय् सामान हयेके बीगु धकाः निर्णय याःसां नं उकियात कार्यान्वयन यायेत समस्या दुगु खँ व्यापारीतय्सं धाःगु दु ।
व्यापारीतय् कथं ‘लकडाउन’ या इलय् आपालं धयाथें गाडी चालक येँय् च्वनाच्वंगु दु ।

उमित रसुवा तक थ्यंकेगु छगू समस्या दुसा मेखे रसुवा थ्यनेधुंकाः गाडी चालक व लोडरयात केरुङ नाकाय् निवाः तक क्वारेन्टाइनय् च्वनेमाः । निवाः तक क्वारेन्टाइनय् च्वनेत आः गाडी चालकत तयार मदुसा मेखे लोडरया अभाव जूगुलिं रसुवा नाकाय् थानाच्वंगु सवारी साधन दुतहयेफइगु अवस्था मदु ।

उम्ह व्यापारीया कथं नेपालं केरुङय् गाडी कायेत वनिपिं चालक व लोडरयाके नेपालं हे कोरोना संक्रमित मदु धकाः सर्टिफिकेट कायेमाः । लिसें केरुङय् दुहां वनेधुंकाः थप झिंप्यन्हु ‘क्वारेन्टाइन’ य् च्वनेमाः ।

वंगु निला न्ह्यः हे चीनं नेपाःपाखे वःगु गाडी केरुङ नाकाय् थानाच्वंगु खः । केरुङय् थानाच्वंगु गाडी स्याउ, पासी व लाभा हःगु खःसा स्याउ व पासी धाःसा पूर्ण रुपं ध्वगिइ धुंकूगु अनुमान नं उम्ह व्यापारीं याःगु दु ।

आः वयाच्वंगु स्याउ डेलिसिस खःसा उगु स्याउ याकनं ध्वगीगु जुयाः उगु स्याउ येँ हयाः नं खास हे ज्या वइमखु । वय्कःया कथं लाभा धाःसा ताः ई तक नं मस्यनिगु जूगुलिं समस्या मदुसां नं इलय् सामान मवःगुलिं व्यापारीतय्त धाःसा थप घाटा जुइगु खँ धाःगु दु । मेखे नेपालय् थप संक्रमितत खनेदयावःगुलिं चीन नं नाका चायेकेगु पक्षय् मदुगु खँ धाःगु दु ।