इंग्लिस प्रिमियरशीप लिग सिटी, युनाइटेड, वेस्टह्याम त्यात

इंग्लिस प्रिमियर लिगय् शनिवाः चान्हय् जूगु कासाय् म्यानचेस्टर सिटी, म्यानचेस्टर युनाइटेड, ब्रिघटन, क्रिस्टल प्यालेस, वेस्ट ह्याम व उल्फहार्मप्टनं विजय चूलाकूगु दु । सिटीइ बर्नमाउथयात १–० गोलं बुकूगु खः । थ्व विजय लिपा सिटी ७१ अंकं सहित शीर्षस्थानय् थहां वंगु दु । सिटी स्वयां छगू कासा म्हो म्हितूगु लिभरपुलया ६९ अंक दु ।

सिटीया विजयया निंतिं रियाद माहरेजं कासाया ५५ औं मिनेटय् निर्णायक गोल याःगु खः । माहरेजं बर्नार्डा सिल्भाया पासय् उत्कृष्ट गोल याःगु खः । शनिवाः चान्हय् जूगु मेगु कासाय् सिटीया शहरी प्रतिद्वन्द्वी म्यानचेस्टर युनाइटेडं नं साउथह्याम्पटनयात बुकल । थःगु घरेलु मैदान ओल्ड ट्राफोर्डय् जूगु कासाय् युनाइटेडं साउथह्याम्प्टनयात ३–२ गोलं बुकूगु खः ।

युनाइटेडया निंतिं रोमेलु लुकाकुं निगू व आन्द्रेस परेरां छगू गोल याःगु खःसा साउथह्याम्प्टनया निंतिं भान भालिरे व जेम्स वार्डं छगू छगू गोल यात । युनाइटेड न्हापांगु हाफय् छगू गोलं लिउने लाःगु खःसां ५४ औं मिनेटय् पेरेरां गोल यानाः कासा बराबरीइ हयाबिउगु खः । थ्व लिपा परेराया पासय् ५९ औं मिनेटय् लुकाकुं गोल यासें युनाइटेडयात अग्रता बिल ।

७५ आंै मिनेटय् जेम्सं गोल यानाः साउथह्याम्प्टनयात हाकनं कासा बराबरीइ हयाबिउगु खः । कासा क्वचायेत १ मिनेट ल्यंदनिबलय् लुकाकुया गोलं युनाइटेडं विजय चूलाकूगु खः । मेखे आर्सेनलं धाःसा टोटनह्याम लिसे १–१ गोलया बराबरीइ चित्त बुझे यायेमाल । बिघ्रटनं हडर्सफिल्डयात १–० गोलं, क्रिस्टल प्यालेसं बर्नलेयात ३–१ गोलं, उल्भहार्मप्टनं कार्डिफयात २–० गोलं व वेस्टह्यामं न्यूकास्टलयात २–० गोलं बुकूगु खः ।