यार्सागुम्बा मी मफया व्यापारी समस्याय्

दार्चुला – दार्चुलाया व्यापारीतय्सं थ्व दँय् न्यानाकाःगु यार्सागुम्बा अझं मीफुगु मदुनि । वंगु असार निसें भदौ तकया दुने न्यानाकातःगु थ्यंमथ्यं निगू क्विन्टल यार्सागुम्बा अझं मी फयाच्वंगु मदुनि । यार्सागुम्बा मी मफुगुलिं व्यापारी व संकलकत समस्याय् लानाच्वंगु दु ।
स्थानीयवासी व व्यापारीतय् मू आयस्रोत जुयाच्वंगु यार्सागुम्बा मी मफयेवं म्हुतु चूलाकेत तकं धौधौ जुयाच्वंगु दु ।

छखे यार्सागुम्बा संकलकतय्सं व्यापारीतय्के यार्साया ध्यबा फ्वनाच्वंगु दुसा मेखे जिल्लाया व्यापारीत थःपिंसं न्यानागु यार्सा मीमफया समस्याय् लानाच्वंगु दु । यार्सागुम्बाया व्यापारी तेजबहादुर बमं थुगुसी न्यानाकाःगु थ्यंमथ्यं छगू क्विन्टल यार्सा मध्ये बछि नं मीमफुनि । ‘झी थ्यंमथ्यं ९० किलो धयाथें यार्सा न्यानागु, तर आःतक ३०–३५ किलो जक मीधुन जुइ’ बमं धाःगु दु ।

दार्चुलाय् यार्साया गुणस्तर स्वयां किलोया १७ निसें २४ लाख तक पुलाः यार्सा न्यानाकाःगु खः । थौंकन्हय् येँ किलोया झिगू लाखं मीत नं थाकुयाच्वंगु दु । मुख्य यानाः चीनय् निर्यात याइपिं व्यापारीतय्सं यार्साया भाः क्वकायेवं मीगु हे बन्द जूवंगु खः ।‘यार्साय् प्रतिकिलो ७ निसें ८ लाख तक घाटा जुयाच्वंगु दु ।

स्थानीय संकलकतय्सं ध्यबा फ्वनेगु सुरु यायेधुंकल, जिमिसं यार्सा मीफुगु मदुनि’ बमं धयादीगु दु । आःया भावं जक यार्सा मिल धाःसां व्यापारी बमयात छगू करोडया घाटा जुइ । दार्चुलां यार्सा न्यानाः येँय् वयेधुंकाः नं हाकनं लिहां वनेधुंकूपिं फुक्क धयाथें व्यापारीत यार्सागुम्बाया भाः मवःगु धासें निराश जुयाच्वंगु दु ।

व्यापारी सोभानसिंह ठगुन्नां धयादिल, ‘लछि येँय् च्वनां नं यार्सा मीमफुत । बैंकं, थःथितिपाखें कयागु त्यासा व संलकतय्त बीमाःगु ध्यबा गये यानाः पुलेगु धयागु हे समस्या जुइधुंकल ।’ अप्वः थें व्यापारीतय्सं अझं जिल्लाय् यार्सा ठन्के यानाःगु दु । यार्सा व्यापारय् न्हापा गुबलें थथे भाः कुहां मवंनि ।

अपी नाम्पा संरक्षण क्षेत्र कार्यालय दार्चुलाया सहायक संरक्षण अधिकृत व सुचना अधिकारी राजु घिमिरेया कथं आःतक जिल्लां ५५५ किलो जक यार्सा निकासी जूगु दु । व्यापारीतय्सं भाः मवःनि धकाः यार्सायात जिल्लां पिने यंकूगु मदुनि । संरक्षण कार्यालयं थुगुसी व्यापारीतय् माग कथं हे यार्सा निकासी अप्वयेकूगु खः ।

यार्सा गुम्बा मीमफुलिं किलं नइगु व ध्वगिना वनीगु चिन्ता व्यापारीतय्के दु । दार्चुलाया अपी, हिमाल, व्यास, दुहुँ, नौगाड गाउँपालिकाया अप्वः धयाथें स्थानीयतय् आर्थिक स्रोत यार्सागुम्बा व जडीबुडी हे खः ।

जिल्लाया लोलु, अपी फेद, सतगंगा, फुल्टेवन, काटै, घट्टेखोला, चाइमटेला, धरमधर, क्षति, नाम्पा, दोपाखे, दुम्लिङ लगायतया पाटनय् यार्सागुम्बा लुइ । दँय्देसं थनं खुगू निसें च्यागू क्विन्टल तक यार्सागुम्बा निकासी जुयाच्वंगु खः । कार्यालयं थ्व दँय् तक यार्सा निकासी यानाः छगू करोड ६३ लाख ५० हजार राजश्व मुंकेधुंकूगु दु ।