नाकाय् भारतया पंगलं पूर्वय् पेट्रोल अभाव

येँ – भारतं नाकाय् पंगः थनेवं नेपाःया पूर्वी लागाय् पेट्रोलियम पदार्थया तच्वःगु अभाव खनेदुगु दु । जोगवनी–विराटनगर नाकां नेपाः दुहां वःगु मालवाहक सवारी साधनय् भारतया फारबिसगञ्ज नगरस्तरीय प्रशासनं पंगः थनेवं पूर्वपाखे वइगु पेट्रोलियम पदार्थ दुहां वये मफयाच्वंगु खँ धाःगु दु ।

पेट्रोल मदुगु कारणं शुक्रवाःनिसें मोरङ, सुनसरी, सिराहा, सप्तरी व उदयपुरया पेट्रोल पम्पत बन्द जुयाच्वंगु दु । भारतया छगू स्थानीय तहया कारणं नेपालय् छवाः न्ह्यव निसें पेट्रोलियम पदार्थ ल्ह्यइगु ट्यांकर दुहां वये मफयाच्वंगु खः । नेपालय् पेट्रोलया तःधंगुअ भाव जुइवं सीमाय् लाःगु भारतीय स्थानीय फारबिसगञ्ज स्थानीय प्रशासन लिसे सहलह यानाः पेट्रोल दुत हयेगु सहमति धाःसा याःगु दु ।

थ्व हे सहमति कथं शनिवाः सछि व न्यागः ट्यांकय् विराटनगरय् दुत हःगु दु । नेपाल आयल निगमया प्रदेश नं. १ या प्रमुख दिनेश यादवं मोरङया सिडिओ रमेश केसी, भारतीय जोगवनी भन्सारया ग्वाहालिं फारबिसगञ्ज प्रशासनलिसे खँ ल्हानाः सहमति याःगु खः । थ्व सहमति कथं सुथय् ६ बजे निसें ८ बजे तक व बहनी १० बजे निसें १२ बजे तक पेट्रोलियम पदार्थ ल्ह्यइगु ट्यांकर चले जुइ ।

थ्व सहमतियात कयाः ढुवानी व्यवासयीतय्सं धाःसा विरोध याःगु दु । डिलर्स एशोसियसन कोशी अञ्चल समितिया उपाध्यक्ष सुनिल बिड्लां धाःगु दु,‘न्हि प्यघौ जक पेट्रोलया गाडी हये दइ धयागु सहमति निगुलिं देय्या पारवहन सन्धि व बिबिआइएन सन्धिया अःखः खः ।’

वय्कलं शनिवाः दुहां वःगु ट्यांकरं आइतवाः व सोमवाः तक जक पेट्रोल अभाव धाने जूसां मंगलवाः निसें हाकनं अज्याःगु हे समस्या वइगु खँ धयादीगु दु । निगमया प्रदेश १ प्रमुख यादवया कथं थःगु कार्यक्षेत्रय् न्हिं डिजेलया ५० व पेट्रोलया २० ट्यांकर चिकं खपत जुयाच्वंगु दु ।