भुमिगत विद्युत प्रणालीयात हाकनं टेन्डर

येँ – विद्युत प्राधिकरणं विद्युत वितरण प्रणालीयात भूतिगत रुपं यंकेगु निंतिं टेन्डर आह्वान याःगुली अनुमानित लागत स्वयां २० प्रतिशत थिकेक जक टेन्डर वःगुलिं हाकनं टेन्डर आह्वान याइगु जूगु दु । प्राधिकरणं न्हापांगु चरणय् येँया महाराजगञ्ज व रत्नपार्क वितरण केन्द्रया वितरण प्रणालीयात भूमिगत रुपं यायेगु तयारी कथं ग्लोबल टेन्डर आह्वान याःगु खः ।

महाराजगञ्ज केन्द्रया निंतिं भारतीय कम्पनी लार्सन एन्ड टर्बो कम्पनीं दकलय् म्हो बोलपत्र पेश याःगु खःसां नं उगु ध्यबा अनुमानित लागत स्वयां अप्वः जूगु खँ धाःगु दु । थ्व बारे प्राधिकरणं निर्णय धाःसा मयाःनिगु खँ सीदुगु दु । विद्युतया भूमिगत योजनाया निंतिं एसियाली विकास बैंक (एडीबीं) १५ अर्ब तका बीत्यंगु दु । सरकारं नं एडीबीयाके १५ अर्ब ४० करोड तका त्यासा कायेगु निर्णय यायेधुंकूगु दु ।

भूमिगत प्रणाली जडान यायेधुंकाः मत इनेगु ज्या अझ प्रभावकारी जुइगु अनुमान प्राधिकरणं याःगु दु । प्राधिकरणं न्हापांगु चरणय् निगू केन्द्रया वितरण प्रणालीयात भूमिगत यानाः लिपा मेगु गुंगू केन्द्रयात नं भूमिगत यायेगु तयारी यानाच्वंगु दु । लिसें भूमिगत लाइन जडान यायेधुंकाः स्मार्ट मिटर नं जडान यायेगु प्राधिकरणया योजना दु । स्मार्ट मिटर जडान लिपा मत खुया काइगु ज्या म्हो जुइगु खँ प्राधिकरणं धाःगु दु ।