इग्लिस प्रिमियर लिग लिभरपुल, सिटी चेल्सी, आर्सनल त्यात

इग्लिस प्रिमियर लिग अन्तर्गत जूगु कासाय् लिभरपुल, म्यानचेस्टर सिटी, चेल्सी, म्यानचेस्टर युनाइटेड व आर्सनल विजयी जूगु दु ।
प्रिमियर लिगया शीर्ष थासय् च्वनाच्वंगु लिभरपुलं वाटफोर्डयात ५–०या तःधंगु अन्तरं बुकूगु खः । लिभरपुलया लागि साडियो मानें निगू, भान डिजेकं निगू व ओरिजिं छगू गोल याःगु खः ।

लिभरपुलं न्हापांगु हाफय् निगू व निगूगु हाफय् स्वंगू गोल याःगु खः । साडियो मानें कासाया ९ आंै व २० औं मिनेटय्, ओरिजि ६६औं मिनेटय् व भान डिजेक ७९ औं व ८२ औं मिनेटय् गोल याःगु खः । मेगु कासाय् लिगया निगूगु थासय् लानाच्वंगु म्याचेस्टर सिटीं वेस्टह्याम युनाइटेडयात १–० गोलं बुकल ।

कासाया छगू जक गोल म्यानचेस्टर सिटीया सर्जियो अग्युराें ५९ औं मिनेटय् पेनाल्टीपाखें याःगु खः।अथेहे लिगया स्वंगूगु थासय् च्वंगु टोटनह्याम धाःसा पराजित जूगु दु । टोटनह्यामयात चेल्सी २–० गोलं बुकूगु खः । निगूगु हाफया ५७ औं मिनेटय् चेल्सीया पेड्रो रोड्रिग्वेजं न्हापांगु गोल याःगु खःसा मेगु गोल आत्मघाती जूगु खः ।

कासाया ८४ औं मिनेटय् ट्रिपियरं आत्मघाती गोल याःगु खः । पराजित जूसां टोटनह्याम लिगया स्वंगूगु थासय् दु । थ्व कासाय् चेल्सीया गोलकिपर केपा एरिजाबलागायात मम्हितुगु खः । म्यानचेस्टर सिटी नाप जूगु कारबाओ कपया फाइनलय् प्रशिक्षकया खँ मन्यंगुलिं केपायात मम्हितुकूगु खः ।

मेगु कासाय् आर्सनलं बोर्नमाउथयात ५–१ गोलं बुकल । आर्सनलया लागि मेसुट ओजिल ४ औं, हेनिरिक मखितार्यान २७ औं, कोसिएल्नी ४७ औ, पिएर एमरिकं ५९औं व एलेक्जेन्डर लाकाजेतीं ७८ औं मिनेटय् गोल याःगु खः । बोर्नमाउथया मोउसेन्टं ३० औं मिनेटय् गोल याःगु खः ।

आर्सनल लिगया प्यंगूगु थासय् थहावंगु दु । अथेहे न्यागूगु थासय् लानाच्वंगु म्यानचेस्टर युनाइटेडं क्रिष्टल प्यालेसयात ३–१ गोलं बुकल । युनाइटेडया रोमेलु लुकाकुं कासाया ३३ औं मिनेटय् व ५२औं मिनेटय् व एस्ले योङं ८३ औं मिनेटय् गोल याःगु खः । क्रिष्टल प्यालेसया वार्डं छगू गोल याःगु खः ।

सम्बन्धित बुखँ

LEAVE YOUR COMMENTS