रियलं सोलारीयात हे प्रशिक्षक याइगु

रियल म्याड्रिडं अन्तरिम प्रशिक्षकया जिम्मा कयावयाच्वंम्ह सान्टियागो सोलारीयात हे स्थायी प्रशिक्षक नियुक्त याइगु जूगु दु । रियलं थुकिया औपचारिक घोषणा मयाःनिसां स्पेनिस फुटबल एसोसिएसनं क्लब व सोलारी दथुया सम्झौता थःपिंके वयेधुंकूगु जानकारी बिउगु दु ।

क्लबं लगातार खराब प्रर्दशन यायेवं रियलं जुलियन लोपेतेगीयात बखासर््त यानाः बी टिम स्वयाच्वंम्ह सोलारीयात अन्तरिम प्रशिक्षकया जिम्मा बिउगु खः । स्पेनिस नियम कथं निवाः दुने स्थायी प्रशिक्षकया घोषणा याये हे माः ।रियलं ४२ दँया सोलारीया नेतृत्व म्हितूगु लिपांगु प्यंगुलिं कासा त्याकूगु दु ।

थ्व क्लबया इतिहासय् सुं नं अन्तरिम प्रशिक्षकया बांलाःगु प्रर्दशन खः । सोलारीया प्रशिक्षणय् रियल म्याड्रिडं कोपा डेल रेय् मेलिलायात, च्यापियन्स लिगय् भिक्टोरिया प्लेज, ला लिगाय् रियल भालाडोलिड व सेल्टा भिगोयात बुकूगु खः ।

म्याड्रिडं थ्व प्यंगू कासाय् १५ गोल यानाः निगू गोल जक नःगु दु । सोलारीं क्लबया जिम्मा काःबलय् म्याड्रिड लिगया ल्याः धलखय् गुंगूगु थासय् लानाच्वंगु खःसा आः खुगूगु थासय् थहां वःगु दु । रियल आः शीर्ष थासय् लानाच्वंगु बार्सिलोना स्वयां ४ अंकं जक लिउने दु ।

सम्बन्धित बुखँ

LEAVE YOUR COMMENTS