बार्सिलोनाया २५ प्रहार, बार्यन म्युनिखया उत्कृष्ट डिफेन्स

स्पेनिस ला लिगाया शीर्ष थासय् च्वंगु बार्सिलोना व फ्रेन्च लिग वान क्लब लियोनं च्याम्पियन्स लिग अन्र्तगत जूगु नकआउट चरणया न्हापागुं लेगय् बराबरी म्हितूगु दु । लियोनया मैदानय् जूगु कासाय् बार्सिलोनायात लियोनं गोलरहित बराबरीइ पंगु खः ।बार्सिलोनां लियोनयात दबाबय् तःगू खःसां गोल धाःसा यायेमफुगु खः ।

घरेलु टिम लियोन विरुद्ध बार्सिलोनां २५ क्वः प्रहार याःगु खःसां गोल यायेमफुत । लियोनया गोलकिपर एन्थोनी पोपेजं बार्सिलोनाया दक्व प्रयास असफल यानाबिउगु खः । पोपेजं बार्साया लियोनल मेसी, लुइस स्वारेज व फिलिप कोन्टिन्होया प्रहार पनाबिउगु खः । लियोनयात नं गोल यायेगु अवसर वःगु खःसां गोल यायेमफुत ।

निगूगु लेग बार्सिलोनाया घरेलु मैदान नोउ क्याम्पय् मार्च १३ कुन्हु जुइ । अथेहे च्याम्पियन्स लिगया मेगु कासाय् लिभरपुल व बार्यन म्युनिखं नं गोलरहित बराबरी म्हितल । वंगु सिजनया उपविजेता इंग्लिस क्लब लिभरपुलं थःगु हे मैदानय् बराबरी म्हितूगु खः । जर्मन क्लब म्युनिकं उत्कृष्ट डिफेन्स न्ह्यब्वःबलय् लिभरपुलं म्युनिखया पोष्टय् मुक्कं निक्वः जक प्रहार यायेफुुगु खः ।

साडिओ मानेयात न्हापांगु हाफय् गोल यायेगु बांलाःगु मौका वःगु खःसां माने उकियात गोल यायेमफुत । अथेहे रोर्बटो फिमिरोया क्रसय् जोइल मटिपं याःगु प्रहार न असफल जूगु खः । थ्व कासाय् माटिपं झण्डै आत्मघाती गोल यायेत्यगुं खः।कासाया निगूगु हाफय् म्युनिखं न्हापांगु हाफय् स्वयां अझ बांलाःगु कासा म्हितूगु खः । बार्यन म्युनिखया डिफेन्सया न्ह्यःने लिभरपुल कमजोर खनेदुगु खः । निगूगु लेग मार्च १३ य् म्युनिखया मैदानय् जुइ ।

 

सम्बन्धित बुखँ

LEAVE YOUR COMMENTS