ख्वपय् कसिमला पाँय्चा कासा

ख्वप – भक्तपुर बचत तथा ऋण सहकारी संस्थाया ग्वसालय् कसिमला पाँय्चा कासा जुल । ६४ क्वःगु राष्ट्रिय सहकारी दिवसया लसताय् उगु कासा वाकुपति चाँगुनारायण द्यःयाथाय् जूगु खः । संस्थाया नायः बलराम प्रजापतिं उलेज्या यानादीगु थुगु कासा परम्परागत रुपं नेवाः समाजय् अतिकं प्रचलित कासा खःसा थ्व कासा अप्वःथें यानाः पुलांपिंसं जक सयेकातःगु व थौंया इलय् लोप जुया वनीगु अवस्थाय् थ्यंगुयात ध्यानय् तयाः उकथं कासाया ग्वसाः ग्वयागु संस्थां जानकारी बिउगु दु ।

स्वीन्हय्गु पुचलं ब्वति काःगु कासाय् ब्वति कयादीपिंत सहकारी दिवसया लसताय् जुइगु ज्याझ्वलय् सिरपाः लःल्हाइ । थुकथं हे सहकारी दिवसया हे लसताय् लाकाः मिसा व मिजं जानाः धुँ व च्वलेचा कासा नं जूगु खः । थुगु कासाय् झिंन्याम्हेसिया पुचलं ब्वति काःगु खःसा थुगु कासाय् ब्वति कयादीपिंत नं वइगु शुक्रवाः सहकारी दिवसया लसताय् जुइगु ज्याझ्वलय् सिरपाः लःल्हाइगु जूगु दु ।