स्वयेबहपिं कासामि

एन्जेलो कान्टे, मिडिफिल्डर, फ्रान्स

न्हापांगु विश्वकप म्हिताच्वंम्ह २७ दँ दुम्ह एन्जेलो कान्टे सन् २०१६ य् तिनि फ्रान्सया सिनियर टिमय् डेब्यु याःगु खः । एन्जेलोयात फ्रान्स बिसें न्ह्यः अफ्रिकन देय् मालीपाखें फुटबल म्हितेगु प्रस्ताव नं वःगु खः । माली एन्जेलोयात सन् २०१५ जूगु अफ्रिकन कप अफ नेसन्स म्हितेगु प्रस्ताव तःगु खः ।

सन् २०१५ य् प्रिमियर क्लब लिचेस्टर सिटी वःम्ह कान्टे छगू सिजन जक लिचेस्टर सिटीइ च्वंगु खःसा वहे सिजनय् लिचेस्टर सिटीं लिग नं त्याकूगु खः । सन् २०१६ य् चेल्सी वंम्ह कान्टें व हे सिजनय् चेल्सीयात नं लिग च्याम्पियन दयेकल ।

अले एन्जेलो कान्टे लगातार निगू फरक फरक इंग्लिस क्लबयापाखें उपाधी त्याकूम्ह कासामि नं जुल । फ्रान्स टिमया मेनेजर डिडियर डेसच्याम्पं कान्टे छम्ह महत्वपूर्ण कासामि जूगु अले भविष्यय् कान्टे अझ अप्वः आवश्यक जुइगु खँ धाःगु दु ।

राफेल भेरान, डिफेन्डर, फ्रान्स

राफेल भेरान फ्रेन्च टिमया नांजाःम्ह डिफेन्डर खः। न्हय्दँ दुबलय् एस हेलिभेस क्लबं फुटबल सयेकाच्वंम्ह भेरानं निदँ लिपा मेगु फ्रेञ्च क्लब लेन्सय् भर्ना जुल ।भेरान लेन्स पाखें फुटबल नं म्हितल ।लेन्सया लागि दछि जक म्हिता वःम्ह भेरान थौंकन्हय् रियल म्याड्रिडय् दु ।
फ्रान्सया यु १८ व यु २१ टिमय् म्हिते धुंकाः सन् २०१३य् भेरानं सिनियर टिमय् डेब्यु यात । भेरानं न्हापांगु कासा जर्जिया विरुद्ध म्हितूगु खः । सन् २०१४य् ब्राजिलय् जूगु विश्वकपय् नं म्हितूम्ह भेरान युरो २०१६ धाःसा चोटया कारणं म्हितमखंगु खः ।

थ्व विश्वकपय् फ्रान्सयात फाइनल तक थ्यंकेगु निंतिं महत्वपूर्ण योगदान बिउम्ह भेरान उरुग्वे विरुद्ध जूगु कासाय् छगू गोल नं याःगु खः । क्वार्टरफाइनल जूगु व कासा फ्रान्सं २–० त्याकूगु खः ।