ने. सं. ११४४ चौलाथ्व दशमी -

नेता निसें अभिनेता रंगशाला निर्माणय्

राज्यया दायित्व धयागु नागरिकतय् जनजीविकानाप स्वापू दुगु, नागरिकतय् जीवन हनेत अति आवश्यक खँयात ध्यानय् तयाः प्राथमिकताया आधारय् विकाश निर्माणया ज्या न्ह्याकेगु खः । तर थौंकन्हय् थःगु म्हगस पूवंकेगु ज्याय् जक देय्या सरकार, नेता, सांसद जक मखु अभिनेतात नापं तक्यना च्वंगु दु ।

थौंकन्हय् नेता निसें अभिनेता तकं अन्तर्राष्ट्रिय रंगशाला दयेकेगु धकाः प्रतिस्पर्धा यानाच्वंगु दु धाःसां जिउ । नेकपाया नेता अले सांसद महेश बस्नेत ख्वपय् अन्तरराष्ट्रिय स्तरया रंगशाला दयकेत स्थानीय कृषकतय्गु तसकं उब्जाउ जग्गा लाका कायेत उद्दत जुयाच्वंगु दु । नेता बस्नेत अन्तराष्ट्रिय स्तरया रंगशाला दयकेत बाज्याया पालं निसेंया बल पिकयाः लगे जुयाच्वंगु दु ।

आः हाकन अभिनेतात नं चितवनय् अन्तर्राष्ट्रिय स्तरया २५ हजार दर्शक क्षमताया क्रिकेट रंगशाला दयेकेगु धकाः तिंतिं न्हुयाच्वंगु दु, व नं चन्दा उठे यानाः । व्यापारिक प्रयोजनया निंतिं छ्यलीगु रंगशाला चन्दा उठे यानाः दयेकां थुकियात समाज सेवा धाइमखु धयागु खँ धुर्मूस सुन्तलिजुं गथे मथुल मसिउ ।

अथे ला मेमेगु ख्यःया विकाश याये माः थें कासाख्यःया नं विकास व बिस्तार यायेमाः । थुकिया लागि भौतिक पूर्वाधार दयेकेमाः धयागु खँय् सुयां निगू मत दइमखु । तर आःया आवश्यकता धयागु निगू निगू अन्तराष्ट्रिय रंगशाला दयेकेगु खः लाकि नागरिकतय् जनजीविका नाप स्वापू दुगु ज्यायात प्राथमिकता बीगु खः ।

तर थौंकन्हय् ला नेता, सांसद जक मखु स्वयम प्रधानमन्त्री तकं थज्याःगु हे जक भौतिक निर्माणया ज्याय् न्ह्यावनाच्वंगु दु । थुकियात हे गौरव तायेकाच्वंगु दु । राजधानीया नागरिकतय् हे लः छघः कायेत चिकुलाया इलय् तकं न्ह्यः पाः यानाः चान्हय् चान्हय् पिवाः च्वनेमाःगु अवस्था दु । व नं लः वइ–मवइया ठेगान मदयेक ।

थज्याःगु अवस्थाय् मेलम्चीया लः याकनं हयाः लःया समस्या ज्यंकेत यकचित्त जुयाः लगे जुइ माःगु खःकि ४ अर्ब खर्च यानाः लिफ्टेड धरहरा दयेकेत लगे जुइगु खः, प्रधानमन्त्री केपी ओली थःम्हं हे बिचाः यायेमाःगु खः । सरकार, स्थानीय सरकार नागरिकतय् आवश्यक्ता पूवंकेगु स्वयां नं धरहरा, पानी जहाज, रेल, मोनो रेल, ततःजाःगु भ्युटावर दयेकेत नि हथाय् चायाच्वंगु खनेदु ।

आःया आवश्यकता वा प्राथमिकता पानीजहाज, धरहरा, रंगशाला, तःतजाःगु भ्युटावर, रेल, मोनोरेल मखु । आःया आवश्यकता व प्राथमिकता धइगु ला स्वास्थ्य, शिक्षा, त्वनेगु लः, सतक, ताँ निर्माण, महंगी नियन्त्रण, रोजगारी, भ्रष्टाचार नियन्त्रण, शान्ति सुरक्षा आदि खः । सरकारं थुकियात हे प्राथमिकताय् तयाः ज्या यायेमाः ।

तर दुईतिहाइया स्थायी एकमना शक्तिशाली सरकार विलासिताया भौतिक निर्माणया ज्याय् हे जक तक्यना च्वंगु खनेदु, अले थुकी हे लय्ताया च्वंगु दु । नेकपाया एकमना सरकार बने जूगु नं दछिं मयाये धुंकल । आःया प्रधानमन्त्री केपी ओलि थ्व स्वयां न्ह्यःनं प्रधानमन्त्री जुइ धुंकूम्ह खः ।

न्हापा आली प्रधानमन्त्री जूबलय् निदँया दुने देय्यात तुइन मुक्त याये धकाः भाषण याःगु खः । ग्व ले, गन गन तुइन मुक्त जुल ? आः नं विद्यार्थीत जोखिमपूर्वक तुइन यात्रा यानाच्वंगु किपा छ्यापछ्याप्ति सोसल मिडियाय् खनेदया हे च्वंगु दु । ग्व ले थुखेपाखे प्रधानमन्त्रीया ध्यान वंगु ? प्रधानमन्त्री ला नेपाःया विकास खनाः विश्व चकित जुल धकाः बकंफुस्लु गफ यानाः हे नयाच्वंगु दु ।

नेतातय् सम्पति बढे जू थें महंगी थहां वनाः हिमालय् तपस्या यानाच्वम्ह महाद्यःया जटाय् थ्यनेधुंकल अय्नं महंगी घटे यायेगु खँ ल्हाइ मखु । थुखे पाखे सरकारया ध्यान गुबलें वंगु मखु । थज्याःगु खनाः विश्व चकित मजुइ ला ? कि गथे ओलीजु ।

तर स्वनिगःया जनता वइन वइन धाःगु मेलम्चीया लः नं मथ्यंगु खनाः चकित जुयाच्वंगु दु । टेलिभिजनख्यःया हास्यकलाकारत सिताराम कट्टल व कुञ्जना घिमिरे लोकह्वाःपि कलाकारत खः । थौंकन्हय् समाजसेवापाखे नं चर्चित जुयाच्वंपिं सिताराम व कुञ्जनायात म्हमसिउपिं शायद हे दइ ।

२०७२ सालया भुखाचं पीडिततय्त थीथी थासय् सामूहिक आवास गृह दयेका बियाः देश–विदेशय् नापं चर्चित जुइत, वाह वाह धायेकेत ताःलाःपिं धुर्मूस सुन्तलिं नापं थौंकन्हय् अन्तराष्ट्रिय स्तरया क्रिकेट रंगशाला दयेकेगु धकाः ब्वाँय् जुइधुंकूगु दु । थुकिं समाजसेवाय् लगे जुयाच्वंपिंसं व्यापाारिक प्रयोजनया निंतिं दयेकीगु रंगशाला चन्दा उठे यानाः दयेकि जिउ कि मजिउ धयागु न्ह्यसः धाःसा ब्वलंकाबिउगु दु ।

आः नं भुखाचं पीडितत यक्व दनि, आः नं विद्यालय, स्वास्थ्य केन्द्र, ताँँ आदिया पुनर्निर्माण जुइमफयाच्वंगु यक्व दनि । यदि सिताराम–कुन्जनां रंगशाला दयेकेगु स्वयां थुखे पाखे ध्यान तःगु खःसा वय्कःपिनिगु सम्मान न्हापा स्वयां नं अप्वइगु खइ ।अथे ला देय्या थीथी थासय् रंगशाला मदुगु नं मखु । येँया दशरथ रगंशालां ज्या काये फयाच्वंगु मदु ।

थ्व रंगशालाय् कासा जुइगु स्वयां नं राजनीतिक दलतय् ज्याझ्वः हे अप्वः जुइगु जुयाच्वंगु दु । छगू रंगशालां ला ज्या कायेफयाच्वंगु मदुसा आः हाकनं मेगु रंगशाला छाय् माःगु ? अथे हे क्रिकेट रंगशालाया खँ ल्हायेगु खःसां नं येँया मुलपानीइ अन्तराष्ट्रिय स्तरया क्रिकेट रंगशाला दयेकेगु धाःगु नं झिदँ दयेधुंकल ।

ग्व ले ज्या न्ह्यागु ? अथे हे कीर्तिपुरया क्रिकेट रंगशालायात नं अन्तराष्ट्रिय रंगशालाय् स्तरोन्नति याये धाःगु नं ग्व ले ज्या न्ह्या ? दुगु रंगशालाय् ला ज्या काये फयाच्वंगु मदुसा आः हाकनं मेगु रंगशाला दयेके माःगु छाय् ?अथे हे नेतानिसें अभिनेता तक रंगशाला निर्माणय् लगे जुयाच्वंगु दु । धाथें रंगशाला निर्माणय् अज्याःगु छु मज्जा दु ले ।

अले नेपालय् दँय् ग्वःगु अन्तर्राष्ट्रिय कासा जुइ ले ? अले क्रिकेटया स्वकुमित नं गुलि दु ले ? थुकिया नं लेखा जोखा यायेमाःगु मखुला ।
सरकार, प्रधानमन्त्रीं मेची निसें महाकालि तक रेल ब्वाकेगु खँ ल्हाइ, भाषण याइ तर सतक पिच यायेगु खँ ल्हाइ मखु । लिफ्टेड धरहरा, रेल, पानिजहाज हयेत हथाय् चाइ मेलम्चीया लः हयेत हथाय् चाइ मखु ।

भ्रष्टाचारयात शून्यय् हये धकाः भाषण याइ तर भ्रष्टाचारीयात कारवाही याइ मखु । नेतातय् सम्पति बढे जू थें महंगी थहां वनाः हिमालय् तपस्या यानाच्वम्ह महाद्यःया जटाय् थ्यनेधुंकल अय्नं महंगी घटे यायेगु खँ ल्हाइ मखु । शेयरबजाः डामाडोल जुयाः लगानिकर्तातय् खर्बौं लगानी घटे जुइधुंकल, ब्यापार घाटा अप्वःगु अप्वलं तुं जुयाच्वंगु दु, थुखे पाखे सरकारया ध्यान गुबलें वंगु मखु । थज्याःगु खनाः विश्व चकित मजुइ ला ? कि गथे ओलीजु ।