च्याम्पियन्स लिग सिटी त्यात, रोनाल्डोया युभेन्टस स्तब्ध

च्याम्पियन्स लिग अन्तर्गत बुधवाः चान्हय् जूगु कासाय् इंग्लिस क्लब म्यानचेस्टर सिटी व स्पेनिस क्लब एथ्लेटिको म्याड्रिड त्याःगु दु । प्रि–क्वाटरफाइनलया न्हापांगु लेग अन्र्तगत जूगु कासाय् सिटीं जर्मनीया एफसी साल्के व एथ्लेटिकाें इटालियन सिरि ए क्लब युभेन्टसयात बुकूगु खः ।

म्यानचेस्टर सिटीं साल्केयात प्रतिस्पर्धात्मक कासाय् वयागु हे मैदानय् ३–२ गोलं बुकूगु खः । सिटीया निंतिं सर्जियो अग्युरो, लियोर साने व रहिम स्टर्लिंङ गोल याःगु खः । साल्केया निंतिं निगू गोल पेनाल्टीया ग्वाहालिं नबिल बेन्तालेबं याःगु खः ।न्हापांगु हाफया १८ औं मिनेटय् सिटीं अग्युरोया गोलया ग्वाहालिं अग्रता काःगु खः ।

न्हापांगु हाफया ३८ औं व ४५ औं मिनेटय् बेन्तालेबं पेनाल्टी गोल यानाः साल्केयात २–१ या अग्रता बिउगु खः । निगूगु हाफया ६८औं मिनेटय् निगू म्हासु कार्ड नयाः सिटीया निकोलस ओटामेन्डीं मैदान त्वतेवं सिटी झिम्ह कासामिइ सीमित जूगु खः । कासाया ८५ औं मिनेटय् लियोर सानें बराबरी गोल यातसा ९० औं मिनेटय् रहिम स्टर्लिङं गोल यानाः साल्केयात बुकूगु खः ।

अथेहे मेगु कासाय् एथ्लेटिकों युभेन्टसयात २–० गोलं बुकल । कासाया निगुलिं गोल निगूगु हाफय् जूगु खः । निगूगु हाफया ७८ औं मिनेटय् जोसे मारिया गिमेजन व ८३ औ मिनेटय् डिएगो गोडनं गोल यानाः युभेन्टसयात बुकूगु खः । एथ्लेटिकोयात गोल याये न्ह्यः पेनाल्टीया अवसर नं वःगु खःसां भिडियो एसिस्टेन्ट रेफ्री (भिएआरं) पेनाल्टी मजूगु क्यंगु खः।

अथेहे भिएआरं अल्भेरो मोराटोया गोलयात नं मबिउगु खः । न्हापांगु हाफय् युभेन्टसया स्टार कासामि क्रिष्टियानो रोनाल्डोया प्रहार एथ्लेटिकोया गोलकिपर जोन ओब्लाकं पनाबिउगु खः । रोनाल्डों थ्व कासाय् बांलाःगु प्रर्दशन यायेमफुगु खः ।