नेपाल सुपर लिगया अक्सनया निंतिं कासामिया नां धलः सार्वजनिक
येँ – नेपाल सुपर लिग (एनएसएल) या निगूगु संस्करणया निंतिं अक्सन यायेत कासामितय्गु नां धल सार्वजनिक जूगु दु । एनएसएलं मंगलवाः २४२ म्ह कासामितय्गु नां सार्वजनिक याःगु खः । कासामितय्त स्वंगू क्याटागोरी विभाजन यानातःगु दु । धलः कथं ‘ए’ क्याटागोरीइ ४० म्ह कासामि दु । अथेहे ‘बी’ व ‘सी’ निगुलिं क्याटागोरीइ १०१÷१०१ म्ह कासामित दु ।
ग्वसाः खल नेपाल स्पोर्टस एण्ड इभेन्ट म्यानेजमेन्टं अक्सन शुक्रवाः जुइ धाःगु दु । अथेहे ग्वसाः खलकं २२ म्ह मार्की प्लेयरया नां धलः नं तयार याःगु दु ।
नेपाल सुपर लिगया न्हापांगु संस्करणय् न्हय्गू टिम दुगु खःसा थुगुसी स्वंगू न्हूगु टिम थप जूगु दु । न्हापांगु संस्करणय् काठमाडौ रेंर्जस एफसी, बिराटनगर सिटी एफसी, ललितपुर सिटी एफसी, पोखरा थर्डस, बुटवल–लुम्बिनी एफसी, धादिङ एफसी व चितवन एफसीं ब्वति काःगु खः । थुगुसी झापा एफसी, स्र्पोटिङ इलाम डि मेची व बीरगंज युनाइटेड एफसी थप जूगु दु ।
न्हापांगु संस्करणय् काठमाडौं नं धादिङयात बुकाः उपाधी त्याकूगु खः । नेपाल सुपर लिगया निगूगु संस्करण चैतय् यायेगु ग्वसाः ग्वयातःगु दु ।
LEAVE YOUR COMMENTS