कन्हय‍्निसें नकआउट चरणया कासा

एजेन्सी- थुगु विश्वकपया नकआउट चरण कन्हय् निसें सुरु जुइत्यंगु दु । नकआउट चरणया न्हापांगु कासा अर्जेन्टिना व फ्रान्स दथुइ नेपाली ई कथं ७ः४५ बजे जुइसा मेगु कासा ११ः४५ बजे पोर्चुगल व उरुग्वे दथुइ जुइ ।

याउँक निगूगु चरणय् दुहां वःगु फ्रान्सं तसकं कठीनपूर्वक समूह चरण पार याःगु अर्जेन्टिनाया सामना यायेत्यंगु खः । तर न्हापांगु चरण अःपुक त्याका वःसां फ्रान्सयात विश्वया उत्कृष्ट कासामित दुथ्याःगु अर्जेन्टिनायात त्याके धाःसा अःपुइ मखु ।

समूह चरणया अन्तिम कासाय् लियोनल मेसीं थःगु लयय् लिहां वयेधुनागु संकेत क्यनेधुंकूगु दु । नाइजेरिया लिसे जूगु अन्तिम कासाय् मेसीं थःगु लय कथं गोल यायेवं अर्जेन्टिना निगूगु चरणय् वयेत सम्भव जूगु खः । मेसीं थ्व स्वयां भचा बांलाक प्रदर्शन यात धाःसा फ्रान्सया निंतिं थाकुका बीफु । थुकिया लिसें एन्जेल डि मारिया, गोञ्जालो हिग्विनपिंसं फ्रान्सया डिफेन्सयात त्वाःथलेगु कुतः याइगु जुइ ।

समूह चरणय् अर्जेन्टिनाया डिफेन्स तसकं बांमलाःगु खनेदुगु खः । फ्रान्स विरुद्ध नं थ्व हे पहलं डिफेन्स जुल धाःसा अर्जेन्टिनायात नं तःधंगु दबाब लायेफु । फ्रान्सया स्ट्राइकर एन्टोनियो ग्रिजम्यान पुरा फर्मय् दु । थुकिया लिसें केलिन एमबाप्पें अर्जेन्टिनायात तःधंगु दबाबय् लाकेफु ।

निगूगु कासाय् मेसीया लिसें विश्वया उत्कृष्ट कासामि जुयाच्वंम्ह रोनाल्डों म्हितेत्यंगु दु । थुगु विश्वकपय् बांलाःगु प्रदर्शन यानाः प्यंगू गोल यायेधुंकूम्ह रोनाल्डों उरुग्वेयात दबाबय् लाकीगु जुइ । तर उरुग्वेया टिमय् नं लुइस स्वारेज थेंज्याःपिं गोल यायेफुपिं कासामि दु । पोर्चुगलया निंतिं स्वारेजया लिसे इनिभन काभानी खतरा जुइफु ।

उरुग्वेया डिफेन्डर सेबेस्टियन कोयट्सं थःपिं रोनाल्डो छम्ह नाप जक मखु पोर्चुगल नाप म्हितेत्यनागु खँ धाःगु दु । कोयट्स पोर्चुगिज क्लब स्पोर्टिङया कासामि खः । मेखे उरुग्वेया डिफेन्डर जस मारिया गिमेन्ज चोटया कारणं थौंया कासा त्वःफिके मालेफु । थुकिं उरुग्वेयात छुं भचा लिच्वः धाःसा लाकेफु ।