हेनरी मोनाकोया प्रशिक्षक नियुक्त

आर्सनलया पुलांम्ह कासामि थिएरी हेनरी मोनाकोया मू प्रशिक्षकय् नियुक्त जूगु दु । ४१ दँया फ्रान्सया हे कासामि हेनरीयात मोनाकों बर्खास्त याःम्ह लियोनार्डो जार्डिमया थासय् हःगु खः । फ्रेञ्च लिग १ य् मोनाको अन्तिम स्वंगूगु थासय् लाःवयेवं जार्दिमयात वंगु मंगलवाः बर्खास्त याःगु खः ।

आर्सनलया कीर्तिमानी गोल यायेधुंकूम्ह हेनरीं मोनोकों थःगु प्रशिक्षकया क्यारियर सुरु यायेदुगु थःगु निंतिं भाग्य हे जूगु खँ धाःगु दु । विश्वया महारथी फुटबल क्लबत युभेन्टस्, बार्सिलोना लिसें न्यूयोर्क रेड बुलया निंतिं नं म्हितेधुंकूम्ह हेनरीं मोनाको न्ह्याबलें थःगु नुगःलिसे सतिगु क्लब जूगु धासें धाःगु दु, ‘जितः बिउगु जिम्मेवारीं जि उत्साहित जूगु दु, थुकिया लिसें कडा मेहनत यायेगु ई नं वःगु दु ।