जू म्हो मजू म्हितीपिं
नेपाल सरकारं कानूनी रुपं हे जू, तास म्हितेगुलिइ प्रतिबन्ध तयातःगु दु । अथे खःसा जू–तास म्हितीपिनिगु ल्याः धाःसा म्हो जुयाच्वंगु मदु । नेपाल सरकारं प्रतिबन्ध तयातःगु जू व तास म्हितूगु द्वपनय् महानगरीय प्रहरी वृत्त खास्थिं वंगु प्यलाया अवधि दुने १७७ म्ह नापं २५ गू लाख बरामद याःगु दु ।
वि.सं. २०७५ असोज २४ गतेनिसें वंगु माघ २२ गतेतक प्यलाया अवधि दुने खास्थि प्रहरी परिसरं थीथी थासं १७ पुचः जू म्हिताच्वंपिंलिसें २४ गू लाख ५४ द्वः ६२५ तका दां बरामद यानागु महानगरीय प्रहरी वृत्त खास्थिया प्रहरी नायब उपरीक्षक नरेन्द्र चन्दं जानकारी बियादिल ।
वंगु भदौ १ गतेनिसें कार्यान्वयनय् वःगु न्हूगु मुलुकी अपराध संहिताय् जू म्हितीपिं व चिठ्ठा संचालन याइपिं नं जेल वनेमाःगु सजाय थप याःगु जूसां नं जू म्हितीपिं व म्हितकीपिनिगु ल्याखय् धाःसा म्हो वःगु खनेमदु ।
वंगु असोज २६ गते येँ जिल्लाया कागेश्वरी मनोहरा नगरपालिका–६ थलीं ६६,९०० तका दांलिसें मधु पौडेललगायत झिंन्याम्हेसिया विरुद्ध खास्थि प्रहरीं मुद्दा चले याःगु खः । उगु हे महिनाय् गोकर्णेश्वर नगरपालिका बेँसीगामं ४९,९५० तका दां व दिलबहादुर राईलिसें न्हय्म्हेसित ज्वनाः इमिगु विरुद्ध मुद्दा चले याःगु खः ।
असोज महिनाय् जक प्यंगू जू म्हितेगु खालं निगू लाख चय्निद्वः ३९५ तका दांलिसें ३५ म्हेसित ज्वनाः महानगरीय प्रहरी वृत्त खास्थिं मुद्दा न्ह्याकूगु खः । अथे हे वंगु कात्तिक महिनाय् येँया खास्थि परिसर दुनेया थीथी होटल व जू म्हितकाच्वंगु खालपाखें सादा वसतय् खटे जुया वंपिं व प्रहरी अधिकृतसहितया पुचलं खुगू लाख झिंखुद्वः ८२५ तका दां बरामद यायेगुयालिसें ५९ म्ह जुवाःद्यःयात ज्वनाः मुद्दा न्ह्याकूगु खः ।
कपन व टाउन प्लानिङया क्षेत्रय् जू म्हितकाच्वंगु धइगु गोप्य सुचंया लिधंसाय् प्रहरीं मंसिर महिनाय् निगू जूया खालं खुगू लाख ३,९८० दांलिसें २१ म्हेसित ज्वनाः मुद्दा चले यानागु प्रहरीं जानकारी बिउगु दु । अथे हे पुस महिनाय् निगू जूया खालं प्रहरीं २८ म्ह जुवाःद्यःनापं बौद्ध फुलबारी व थलिं ७ गू लाख ५० द्वः ७५५ तका दां बरामद याःगु खः ।
ज्वंपिं सकलें विरुद्ध मुद्दा दर्ता यानागु प्रहरी नायब उपरीक्षक चन्दं जानकारी बियादिल । चालु माघ महिनाया २२ गते तकया दुने ३४ म्ह जुवाःद्यः ज्वने धुंकूगु व इमिगुपाखें निगू लाख ६७० तका दां बरामद याःगु खः । जू म्हिताच्वंपिंत ज्वनेवं थप अनुसन्धानलिपा म्याद थप यानाः मुा दर्ता यायेगु यानाच्वनागु प्रहरीं जानकारी बिउगु दु ।
चन्दं धयादिल, ‘जू म्हितेत गुम्हेसिनं छेँ, क्वथा, गुगुं सम्पत्ति व गाडीइ थाय् बिल धाःसा इमित नं कारवाही यायेगु जुइ ।’ कानूनीरुपय् अज्याःगु ज्याय् संलग्न जूपिं न्ह्याम्हेसित नं कारवाही यायेगु व्यवस्था दुगु वय्कलं जानकारी बियादिल । खास्थि क्षेत्रं महानगरीय प्रहरी वृत्त खास्थिं १६ गू मुद्दा चले याःगु दुसा प्रहरी परिसर टेकुं छगू मुद्दा चले याःगु दु ।
होटल व रेष्टुराँयात प्रहरीं निगरानीइ तयाः छापा मारे यायेगु याना हयेवं आः छेँय् छेँय् मुनाः जू म्हितेगु यानाच्वंगु महानगरीय प्रहरी प्रभाव कपनया प्रहरी निरीक्षक मीनबहादुर कुँवरं कनादिल । गोप्य सुचंया लिधंसाय् छेँय् छेँय् वनाः प्रहरी जू म्हिताच्वंपिनिगु अखडाय् छापा मारे यायेगु यानाच्वंगु दु ।
लिपांगु इलय् छेँखां हे अप्वःथें जू म्हिताच्वंपिंत ज्वने याना हयाच्वंगु तथ्यांक दुगु कुँवरं जानकारी बियादिल । महानगरीय प्रहरी प्रभाव सक्व व प्रहरी चौकी नांग्लेभारें वंगु वाःया शनिवाः येँया चापाकोबोट धइगु थासं १२ म्ह जू म्हिताच्वंपिंत ज्वंगु खः । ज्वंपिं अप्वःथें ५० दँ पुलेधुंकूपिं खः । बजाः केन्द्रीत जू आः वयाः बजारं येँया थीथी थासय् व गामय् पाखे विस्तार जुया वनाच्वंगु प्रहरी प्रभाव सक्वया प्रहरी निरीक्षक लक्ष्मी खनालं जानकारी बियादिल ।
प्रहरीया पहुँचपाखें बचे जुइ फइ धासें जू म्हितीपिंसं थौंकन्हय् येँ जिल्लाया ग्रामिण क्षेत्रयात अखडा दयेका वयाच्वंगु जूसां नं प्रहरी जू म्हितेगु नियन्त्रण यायेत सुक्ष्म अनुसन्धानसहित कारवाही यानाच्वनागु खनालं जानकारी बियादिल ।मलुकी अपराधसंहिताकथं न्हापांखुसी जू म्हिताच्वंपिं व म्हितकूम्हेसित स्वला तकया कैद वा स्वीद्वः तका जरिवाना क्वःछिनातःगु दु ।
निक्वःगु पालंनिसें जू म्हितूपिं व म्हितकूम्हेसित दछितक कैद वा न्यय्द्वः जरिवाना जुइ । वयां लिपा नं जू म्हितेगु व म्हितकेगु यात धाःसा स्वदँतकया कैद व छगू लाख तक जरिवाना जुइगु २०७५ भदौ १ गतेनिसें लागू जूगु मुलुकी अपराध संहिताय् न्ह्यथनातःगु दु ।
जू म्हितीपिं जक मखसे मेपिंसं जू म्हिताच्वंथाय् ध्यबा पाइपिंत नं जू म्हितूगु हे सरह कारवाही जुइगु कानूनी प्रावधान दु । भदौ १ गते स्वयां न्ह्यः जू म्हितीपिंत जुवा ऐन २०२० अन्तर्गत कारवाही यायेगु याना वयाच्वंगु खः । आः मुलुकी अपराधसंहिता, २०७४ लागू जुइवं व हे कानूनी प्रावधानकथं कारवाही यायेगु याना वयाच्वंगु दु ।
LEAVE YOUR COMMENTS