कर्माचार्यपाखें १५५ क्वःखुसी हिदान

येँ – डोटेली समाज येँया ग्वसालय् जूगु हिदान ज्याझ्वलय् प्रेमसागर कर्माचार्यं १५५ क्वःखुसी हिदान यानादिल । न्हू बानेश्वरय् च्वंगु छक्कुबक्कु पार्कय् जूगु ज्याझ्वलय् येँय् च्वनाच्वंपिं डोटेलीलिसें ७७ म्हेसिनं हिदान यानादीगु खः ।समाजया अध्यक्ष जगदीश केसीया सभापतित्वय् जूगु ज्याझ्वलय् १५५ क्वः हिदान यानादीम्ह कर्माचार्य मूपाहांकथं झायादीगु खःसा सांसद प्रेमबहादुर आलेमगर विशेष पाहांकथं झायादीगु खः ।

समाजया सचिव लक्ष्मण मलासीं लसकुस यानादीगु ज्याझ्वलय् नेपाल रेडक्रस सोसाइटी केन्द्रीय रक्तसंचार सेवाया निर्देशक डा. मनिता राजकर्णिकारं नेपाल स्वयमसेवी रक्तदाता समाजया अध्यक्ष नापं दकलय् अप्वः हिदान यानादीम्ह कर्माचार्ययात हि संकलन यायेगु म्हिचा लःल्हानादीगु खः ।

समाजया ग्वसालय् न्हापांखुसी जूगु हिदान लिपा कर्माचार्यं उगु म्हिचा समाजया अध्यक्षयात लःल्हानादीगु खःसा वय्कलं डा. राजकर्णिकारयात लःल्हानादीगु खः । अथे हे समाजया अध्यक्ष केसीं संकलन जूगु हिया पाकेट दक्वं रक्तसंचार सेवा केन्द्रया निर्देशक डा. राजकर्णिकारयात लःल्हानादीगु खः ।