मनसुन दुहां वइगु सम्भावना अप्वल

येँ (नेपालभाषा टाइम्स) – देय्न्यंकं तांन्वःगु अप्वया वनाच्वंगु इलय् छुं न्हि लिपा हे नेपालय् मनसुन दुहां वइगु जूगु दु । मौसम पूर्वानुमान महाशाखाया कथं जेठ ३० गते सतिना वःलिसे मनसुनया नितिं अनुकूल वातावरण ब्वलंगु दु ।

नेपालय् मनसुनया ३० दँया मौसम विश्लेषण कथं नेपालय् मनसुन दुहां वइगु जेठ ३० गते खःसा पिहां वनीगु ई असोज १५ गते खनेदु । थुगुसी मनसुन दुहां वये न्ह्यः पश्चिमी वायुया लिसें बंगालया खाडीया जलवाष्पयुक्त फय् व बिहारा जःखः दुगु न्यून चापीय क्षेत्रया आंशिक प्रभाव लाःगु खँ मौसमविद्तय्सं धाःगु दु । थुकिं क्वःछिनातःगु इलय् नेपालय् मनसुन दुहां वइगु सम्भावना अप्वया वंगु खँ मौसमविद् रोजन लामिछानें कनादिल ।

वय्कलं धयादिल, ‘वंगु शनिवाः निसें प्रदेश नम्बर १ या तापक्रम कुहां वयाच्वंगु दु, सुपाँय् बने जुयाच्वंगु दु, मनसुनया नितिं माःगु अनुकूल वातावरण बने जुया वनाच्वंगु अवस्था खनेदु ।’

थौंकन्हय् तान्वइगु अप्वया वनेवं देय्या थीथी थासय् तापक्रम थहां वनाः न्हूगु कीर्तिमान तःगु दुसा गुलिखे थासय् तापक्रम थहां वनाः जनजीवन प्रभावित जूगु दु ।