संघीय समाजवादी नेवाः संघया वार्षिकसभा

येँ – संघीय समाजवादी फोरम, नेपाल (ससफो)या संघीय समाजवादी नेवाः संघया वार्षिकसभालिसें संघया न्हूधाः यायेगु ज्या वंगु शनिवाः जुल । संघया अध्यक्ष सत्यनारायण डंगोलया अध्यक्षताय् जूगु ज्याझ्वलय् मूपाहांकथं ससफोया सहअध्यक्ष राजेन्द्रप्रसाद श्रेष्ठ झायादीगु खः ।

ज्याझ्वलय् नवासें मूपाहां श्रेष्ठं उत्पीडित वर्ग व समुदायया हरेक आन्दोलनय् थम्हं न्ह्याबलें साथ बियाच्वनेगु नापं ग्वाहालि नं याना च्वनेगु जुइ धासें विकासया नामय् स्वनिगःया सम्पदा नाश यानाः याइगु अतिक्रमण विकास मखसे विनाश खः धयादिल । वय्कलं धयादिल, ‘छायाँदेवी कम्पलेक्स, सप्तपाताल पुखू, चाबहीया दिप दुगु थाय्या अतिक्रमण, ख्वना–बुंग क्षेत्रया समस्या लगायत थीथी समस्याय् विरुद्ध न्ह्यानाच्वंगु विरोध व आन्दोलनय् साथ व समर्थन दयाच्वनी ।’

प्रतिनिधिसभाया सदस्य तकं जुयाच्वनादीम्ह श्रेष्ठं थःगु पार्टीं न्ह्यःने हःगु संघीय समाजवाद नेपाः थेंज्याःगु बहुराष्ट्रिय देय्या जातीय व वर्गीय समस्या ज्यंकेत अचुक निशाना जूगु धासें वय्कलं कांग्रेसया लोकतान्त्रिक समाजवाद व नेपाल कम्युनिष्ट पार्टी (नेकपा)या समाजवाद उन्मुख जनवाद खतं नयेधुंकूगुलिं आः उकिया ज्या मदु धयादिल ।

थःगु पार्टीलिसे वैचारिक प्रतिस्पर्धा याये मफुगुलिं हे कांगेस व नेकपा थेंज्याःगु पुलांगु शक्ति ससफोनयात जातिवादी, मधेसवादी, विखण्डनवादी थेंज्याःगु भ्रम न्यंका वयाच्वंगु वय्कलं द्वपं बियादिल ।

संघया उपाध्यक्ष खगेन्द्रबहादुर जोशीं लसकुस यानादीगु व उपाध्यक्ष शेषनारायण महर्जनं सुभाय् देछानादीगु ज्याझ्वलय् पार्टीया केन्दीय दुजःपिं डा. पुष्पराज राजकर्णिकर, न्हुछेलाल महर्जन, पवित्र वज्राचार्य, मनरत्न शाक्य, ३ नं प्रदेशया इन्चार्ज सिद्धिबहादुर जोशी, संघया उपाध्यक्ष नवीन श्रेष्ठ, दुजः प्रेरणा शाक्यं नं थःथःगु विचाः तयादीगु खः ।

संघया अध्यक्ष डंगोलं राजनीतिक प्रतिवेदन व पुलांम्ह कोषाध्यक्ष बेखामान अवालें आर्थिक प्रतिवेदन न्ह्यब्वयादीगु उगु ज्याझ्वलय् संघया न्हूधाः नं याःगु खः । न्हूधाःकथं डंगोलया हे अध्यक्षताय् पुलांगु हे ज्यासना पुचःयात कायम यानाः छुं न्हूपिं नं पदाधिकारी व दुजःपिं थप यासें संघया ज्यासना पुचः पीछम्हेसिया दयेकूगु खः ।

 

सम्बन्धित बुखँ

LEAVE YOUR COMMENTS