येँ महानगर दुने २८४ थासय् सार्वजनिक चःबि

येँ महानगर दुने २८४ गू सार्वजनिक चःबि संचालन याये फइगु प्रतिवेदन प्राप्त जूगु दु । वंगु माघ ६ गते गठन जूगु सार्वजनिक चःबि निर्माण सम्बन्धी कार्यदलं येँ महानगरपालिकाया उपप्रमुख हरिप्रभा खड्गी श्रेष्ठयात चःबि अध्ययन प्रतिवेदन लःल्हासें उगु सुझाव बिउगु खः ।
प्रतिवेदनय् आः ५८ गू सार्वजनिक चःबि संचालनय् दुगु तथ्यया लिधंसाय् दुगु चःबिया अवस्था हिलेगु व सुविधा थप यानाः तत्काल महसुस याये फइकथंया सुधार हयेगु खँ न्ह्यथनातःगु दु ।

महानगर दुनेया व्यावसायिक भवन (सपिंग कम्प्लेक्स व मल) मध्ये ६७ गू सार्वजनिक चःबि संचालन यायेगु सम्भव जू ।कर्मचारी संचय कोष, खाद्य संस्थान, सांस्कृतिक संस्थान, गुथि संस्थान, त्रिभुवन विश्वविद्यालय थेंज्याःगु निकायलिसें समन्वय यायेबलय् झिंनिगू चःबि थप याये फइगु प्रतिवेदनय् क्यनातःगु दुसा आयल निगमं संचालन याःगु पेट्रोल पम्पय् ७२ गू चःबि थप याये फइगु प्रतिवेदनय् धयातःगु दु ।

कार्यदलं येँ महानगरया ५७ गू थासय् सार्वजनिक चःबि तये फइगु सम्भावना क्यनातःगु दु । वडाअध्यक्षलिसेया सहलह लिपा अज्याःगु थासय् चःबि दयेकेबलय् आवश्यकतायात आधार कयाः दयेकेमाःगु जुइ । थुकथं स्वयेबलय् टेकु चोक, सानेपा ताँ, कालिमाति, कलंकी, सीतापाइला, बालाजु, माछापोखरी, ग्वंगःबुँ प्रहरी चौकी, महाराजगंज, सुकेधारा, चाबही, मित्रपार्क, जयबागेश्वरीइ न्हापांगु चरणय् ज्या यायेमाःगु थाय्या रुपय् सिफारिस यानातःगु दु ।

थुकथं हे गौशाला, तीनकुने, कोटेश्वर, न्हू बानेश्वर, बबरमहल, थापाथली, त्रिपुरेश्वर, सुन्धारा, एनएसी, जुद्ध शालिक (न्हू सतक) जःखः, हनुमानध्वाखा, जमः, लैनचौर, सो¥हखुट्टे, बल्खु, कुलेश्वरय् नं न्हापांगु चरणय् ज्या यायेमाःगु थाय्या रुपय् सिफारिस यानातःगथु दु । थ्व बाहेकया थासय् निगूगु चरणय् ज्या यायेबलय् चाप व्यवस्थापन नं जुइ ।

प्रतिवेदन लःल्हायेगु झ्वलय् कार्यदलया संयोजक नापं सार्वजनिक निजी साझेदारी इकाइ प्रमुख धु्रवकुमार काफ्लें आः चले जुयाच्वंगु गुलिखे चःबिइ लः, ल्हाः सिलेत साब्वं मदुगु, अपांगमैत्री मजूगु, जः बांलाक दुहां मवःगु, मिसातय्त स्यानिटरी प्याड हिलेगु व वांछ्वायेगु थाय् मदुगु खँ न्ह्यथँसें अज्याःगु आधारभूत सुविधा नियमन जक याये फत धाःसां नं तत्काल सुधार जुइगु खनेदु धयादिल ।