सहकारीं ध्यबा मबियाः मनू सित

येँ (नेपालभाषा टाइम्स)- थम्हं ध्यबा बचत यानातयागु सहकारीपाखें ध्यबा लित कायेमफयेवं उपचार हे यायेमखनाः मनूत सीगु घटना जुया वयाच्वंगु दु । थ्वहे झ्वलय् येँ भिंद्यःत्वाःया (थौंकन्हय् शंखमुल) ६६ दँया भाइराजा धाइम्ह राजेन्द्र स्थापित नं ध्यबाया अभावय् उपचार यायेमखनाः मृत्यु जुइवं सहकारी पीडितत सतकय् कुहां वःगु दु ।

स्थापित ताःई न्ह्यवंनिसें विरामी जुयाच्वंम्ह खः । थ्वहे दथुइ खुन्हु न्ह्यव वय्कःयात मस्तिष्काघात जुल । अपरेशनया निंतिं न्यागू लाख दां आवश्यक जुल । अपरेशन यायेगु निंतिं ध्यबा अभाव जूगुलिं वय्कःया छेँजःपिंसं वय्कलं ध्यबा तयातःगु न्यूरोडय् च्वंगु युवा विकास बहुउद्देश्यीय सहकारीइ स्वापू तयाः उपचारया निंतिं न्यागू लाख ध्यबा बीत इनाप यात । थुगु सहकारीइ स्थापितं छगू करोड ३३ लाख तका बचत यानातःगु खः, तर उपचारया निंतिं न्यागू लाख तका ध्यबा तकं सहकारीं मबिउबलय् उपचार हे यायेमखंक वय्कलं मृत्युवरण यायेमाल ।

सहकारीतय्सं ठगीया कारणं ध्यबा दःसां नं दां ल्हातय् लाकेमफुगु कारणं उपचार हे यायेमखंक सहकारी पीडित सिनाच्वंगुलिं म्हिगः सहकारी बचतकर्ता संरक्षण राष्ट्रिय अभियान महासंघया नेतृत्वय् स्थापितया किपायात कफिनय् तयाः प्रदर्शन याःगु खः ।

सहकारी ठगतय्त राज्यं हे संरक्षण यानाच्वंगुलिं सहकारी पीडिततय्सं उपचार हे यायेमखंक ज्यान छ्वये माला च्वनेमाःगु धासें महासंघं प्लेकार्ड सहित रत्नपार्कया शान्तिवाटिकांनिसें भद्रकालीतक प्रदर्शन याःगु खः । प्रदर्शनया झ्वलय् ‘सहकारी पीडितयात न्याय बिउ’, ‘सहकारी मन्त्री राजीनामा ब्यू’, ‘सहकारी ठगत होशियार’ धयागु नारा थ्वयेकूगु खः ।

प्रदर्शनय् राष्ट्रिय मुक्ति क्रान्ति नेवाः राष्ट्रिय परिषद्पाखें नं साथ बिउगु खः । परिषद्या संयोजक सुमन सायमिं स्थापितया मृत्यु सामान्य मृत्यु मखु, हत्या खः धासें थुकिया जिम्मेवारी सरकारं कायेमाःगु खँ धयादिल । सरकारं हे सहकारी चायेकेबिउगु, तर बालांक अनुगमन निरीक्षण मयाःगुलिं थज्याःगु अवस्था वःगु खः धासें थुकिया जिम्मेवारी सरकारं नं कायेमाःगु खँ वय्कलं धयादीगु दु । सहकारी ठगे याःपिं फुक्क धयाथें हे सत्ता व नेतातलिसे सतीपिं जूगुलिं उमित कारवाही मजूगु खँ धासें वय्कलं आः राज्यपाखें हे थुकथं पीडितपिंत छप्पँ यानाः उमित न्याय बीकेगु निंतिं राष्ट्रिय मुक्ति क्रान्तिपाखें अभियान न्ह्याका च्वनागु खँ नं धयादीगु दु ।