अमेरिकाया अतिरिक्त आयात शुल्क विरुद्ध ब्राजिलं डब्लुटीओय्
एएफपी – अमेरिकां थीथी उत्पादनय् तःगु अतिरिक्त शुल्क विरुद्ध ब्राजिलं विश्व व्यापार संगठन (डब्लुटीओ)य् औपचारिक परामर्शया माग दर्ता याःगु दु । थःपिनिगु थीथी उत्पादनय् अमेरिकां अतिरिक्त आयात शुल्क तःगु धासें उकिया विरुद्ध ब्राजिलं डब्लुटीओय् औपचारिक परामर्शया माग दर्ता याःगु खः।
ब्राजिलया विदेश मन्त्रालयं सोमवाः छपु विज्ञप्ती जारी यासें जुलाई २७ य् डब्लुटीओय् विवाद समाधान संयन्त्र अन्तर्गत अमेरिकालिसे परामर्शया निंतिं औपचारिक इनाप माग दर्ता याःगु खः । ब्राजिलं अमेरिकां लागू याःगु अतिरिक्त आयात शुल्क अन्तर्राष्ट्रिय व्यापार नियम अःखः व अन्यायपूर्ण जूगु दावी याःगु दु । ब्राजिलया विदेश मन्त्रालयं अमेरिकां लागू याःगु अतिरिक्त शुल्क अन्तर्राष्ट्रिय व्यापार नियमलिसे ज्वःमलाःगु व निमय संगत नं मजूगु धाःगु दु ।
अमेरिकी राष्ट्रपति डोनाल्ड ट्रम्पं नेतृत्वया प्रशासनं थ्व हे महिनानिसें ब्राजिलया आपालं उत्पादनय् निगू चरणय् न्हूगु शुल्क लागू यायेगु घोषणा याःगु खः । अमेरिकां अनुचित व्यापार अभ्यासया लिधंसाय् २५ प्रतिशत व जबर्जस्ती श्रम छ्यःगु द्वपं बिसें थप १२.५ प्रतिशत शुल्क लागू याःगु खः ।
सन् २०२५ य् ब्राजिलं नं नं थुकथंया हे प्रक्रिया नालाकाःगु खः । उगु इलय् अमेरिकां ब्राजिलया पुलांम्ह राष्ट्रपति जाइर बोल्सोनारोलिसे सम्बन्धित मुद्दायात कयाः ब्राजिलयात ५० प्रतिशत शुल्क लागू याःगु खःसा लिपा उकियात आंशिक रुपं जक लित काःगु खः । ब्राजिलं याःगु परामर्श माग डब्लुटिओया प्रक्रियाकथं परामर्शया इनाप विवाद ज्यंकेयमा निंतिं प्यानल गठन याये स्वयां न्ह्यःया प्रारम्भिक चरण खः ।
थ्व हे झ्वलय् ब्राजिलय् राष्ट्रपतीय निर्वाचनया तनाव ब्वलाच्वंगु दु । वइगु अक्टोबरय् ब्राजिलय् राष्ट्रपतीय निर्वाचन जू वनाच्वंगु दु । ब्राजिलय् वइगु अक्टोबरय् राष्टपतीय निर्वाचन जूवनाच्वंगु दुसा व स्वयां न्ह्यः अन राजनीतिक तनाव नं उतिकं अप्वया वनाच्वंगु दु । पुलांम्ह राष्ट्रपति बोल्सोनारोया काय व दक्षिणपन्थी उम्मेदवार फ्लेभियो बोल्सोनारो वर्तमान राष्ट्रपति लुइय इनासियो लुला डा सिल्भालिसे प्रतिस्पर्धाय् कुहां वयेत्यंगु दु ।
वर्तमान राष्ट्रपति डा सिल्भां निर्वाचनय् राजनीतिक लबः कायेत फ्लेभियो बोल्सोनारों अमेरिकायात शुल्कया दबावयात प्रोत्साहन बिया वयाच्वंगु द्वपं बिउगु दु । फ्लेभियो बोल्सोनारों धाःसा डा सिल्भाया द्वपनय् छुं नं सत्यता मदु धासें उकियात अस्वीकार याःगु दु ।
LEAVE YOUR COMMENTS