ने. सं. ११४४ ञलाथ्व नवमी -

गठबन्धनय् सरकार गठनया चर्चा

येँ (नेपालभाषा टाइम्स)- क्वचाःगु चुनावया लिच्वः सार्वजनिक जुया वःलिसे आः न्हूगु सरकार सुनां व गय् यानाः गठन यायेगु धइगु तयारी नं सुरु जूगु खँ सीदुगु दु ।
आः न्हूगु सरकार नं वर्तमान सत्ता गठबन्धनं हे दयेकीगु सम्भावना अप्वया वःगु दुसा उकिया लागिं नेपाली कांग्रेस व नेकपा माओवादी केन्द्रया नेतातय्सं प्रारम्भिक तयारी समेत न्ह्याकेधुंकूगु खँ सीदुगु दु ।

गठबन्धनया नेतातय्सं आः न्हूगु सरकार गठन यायेगु लागिं वर्तमान गठबन्धन हे सक्षम जुइगु व सिट संख्या गाइगु खँ धाःगु दु । छगू निगू सिट मगाःसां चीधंगु पार्टीलिसे काये फइगु खँ नं उमिसं धाःगु दु ।

आःया तकया लिच्वः स्वयेबलय् एमाले व रास्वपायात अलग्ग तल धाःसां नं गठबन्धनया बहुमत खाइगु सम्भावना दु । गठबन्धनया बहुमत वइगु सम्भावना प्रष्ट जुया वःगुलिं आः न्हूगु सरकारया खाका गथे जुइ व थुकी सु सु दुथ्याके माली धकाः सहलह यायेत गठबन्धनया वरिष्ठ नेतातय् दथुइ अनौपचारिक खँल्हाबल्हा जूगु खँ सूत्रं धाःगु दु ।

गठबन्धनं हे सरकार दयेकल धाःसा प्रधानमन्त्रीया रुपय् हानं कांग्रेस सभापति शेरबहादुर देउवा हे न्ह्यःने वयेफइगु खँ धाःगु दु । खतुं देउवायात कांग्रेसया संसदीय दलय् गगन थापां हाथ्या बीगु सम्भावना दुसां आः देउवा पक्षयापिं हे यक्व त्याना वःगु जुयाः थापा दलया चुनावय् पराजित जुइगु खँ धाःगु दु ।

गठबन्धन दुने माओवादी केन्द्रया अध्यक्ष पुष्पकमल दाहालं नं रुचि क्यनाच्वंगु खँ पिहां वयाच्वंगु दु ।