भारतय् मुस्मांतय्त पक्षपात याइगु कानुन

भारतया क्वय्या संसद्ं नागरिक सम्बन्धी छगू विवादस्पद कानुनयात पारित याःगु दु । नागरिकताय् मुस्मां समुदायया मनूयात पक्षपात जुइकथंया व्यवस्था दुगु उगु कानुन मंगलवाः पारित जूगु खः । थ्व न्हूगु कानुनय् म्होतिं नं खुदँ तक भारतय् च्वनाच्वंपिं बंगलादेश, पाकिस्तान व अफगानिस्तानया हिन्दू, क्रिश्चियन व शिख धर्मावलम्बीतय्त नागरिकता बीगु, तर मुस्मां जूसा नागरिकता मबिइगु खँ न्ह्यथनातःगु दु ।

न्हूगु कानुनं मुस्लिम समुदाययात अन्याय याःगु धासें आलोचना जुयाच्वंगु दु । नागरिकताया निंतिं धर्म विशेषयात पक्षपात यानातःगुलिं थ्व कानुन विवादय् लाःवंगु खः । प्रधानमन्त्री नरेन्द्र मोदी हे हिन्दूवादी जूगुलिं मुस्मांत प्रति थुलि अनुदार कानुन पारित जूगु खँ पिहां वयाच्वंगु दु ।