फ्रान्सं चिकनय् कर लित काल

फ्रान्सेली सरकारं चिकनय् कर अप्वयेकेगु निर्णय लित कायेगु घोषणा याःगु दु । फ्रान्सया प्रधानमन्त्री एडआर्डो फिलिप्पें मंगलवाः हे चिकनय् कर अप्वयकेगु निर्णयया विरोध यानाच्वंपिं प्रदर्शनकारीतय्त नापलायेगु खँ धाःगु खःसां प्रदर्शनकारीतय्सं धाःसा वय्कःलिसे वार्ता यायेत अस्वीकार यानादीगु खः ।

‘येलो वेस्ट’ नांया विरोध यानाच्वंगु छगू पुचःया दुजःतय्सं मेपिं कट्टर प्रदर्शनकारीतय्सं थःपिंत वार्ताय् वन धाःसा स्यायेगु धम्की बिउगुलिं वार्तां ल्हाः लिकायेमाःगु खँ धाःगु दु । पेट्रोल व डिजेलय् कर अप्वयेकूगु खँयात कयाः फ्रान्सय् वंगु नोवेम्भर निसें थाय्थासय् प्रदर्शन जुयाच्वंगु खः । तर छुं न्हि न्ह्यव निसें थ्व प्रदर्शन तसकं आक्रामक जुयावःगु खः ।

गुकी लानाः आःतकया दुने स्वम्हेसिया ज्यान वनेधुंकूगु दु । फ्रान्सया गृह मन्त्रालयया कथं वंगु आइतवाः जूगु प्रदर्शनय् थ्यंमथ्यं छगू लाख ३६ हजार मनूतय्सं ब्वति काःगु खः । फ्रान्सया राष्ट्रपति इमानुएल म्याक्रों धाःसा पेरिसय् जुयाच्वंगु प्रदर्शनयात अनुचित धयाच्वंगु दु ।

सम्बन्धित बुखँ

LEAVE YOUR COMMENTS