क्यानेडियन नेवाः गुथिया पुलांगु व वर्तमान ज्यासना पुचःया भेला
येँ (नेपालभाषा टाइम्स) – क्यानेडियन नेवाः गुथिया ग्वसालय् गुथिया पुलांगु व वर्तमान ज्यासना पुचmया दुजः व सल्लाहकरतय् छगू मुँज्या जुल । वंगु जुलाई १८ कुन्हु मिसिसागाया पोर्ट क्रेडिट पार्कय् गुथिया पुलांगु व वर्तमान ज्यासना पुचःया कार्यकारी बोर्डया दुजः व सल्लाहकारपिनिगु उगु मुँज्या जूगु खः ।
उगु मुँज्याया उद्देश्य पुलांगु व वर्तमान ज्यासा पुचःया दथुइ स्वापू क्वातुकेगु, अनुभव कालबिल यायेगु नापं गुथिपाखें थौंकन्हय् यानाच्वंगु गतिविधि, क्रियाकलाप, ज्याझ्वः व भावी योजना बारे पुलांगु नेतृत्वयात जानकारी बीगु जूगु गुथिं जानकारी बिउगु दु । थुकिया लिसें याकनं हे जुइगु ‘नेपाली मेला’ व ‘हिमालयन मेला’य् क्यानेडिन नेवाः गुथिया सहभागिताया बारे नं जानकारी बीगु ज्या जूगु खः ।
थुकथं हे सेप्टेम्बर २६ य् जुइगु गुथिया थःगु हे सांस्कृतिक ज्याझ्वः ‘समयबजि’या तयारीयात कयाः नं सहलह जूगु खः । नेवाः संस्कृति व संस्कार दुने तसकं महत्वं जाःगु व प्रतीकात्मक परम्पराकथं कयातःगु ‘समयबजि’ ज्याझ्वः गुथिं थःगु स्थापनाकालनिसें तसकं उत्साहपूर्वक निरन्तरता बिया वयाच्वंगु दु ।
मुँज्याय् ब्वति कयादीपिं पुलांगु व न्हूगु ज्यासना पुचःया दुजः, सल्लाहकारपिंसं थःथःगु अनुभव व सुझावत कालबिल यायेगु ज्या जूगु खःसा वर्तमान ज्यासना पुचलं मदिक्क ग्वाहालि यायेत, सही मार्गदर्शन व गुथिया ज्याझ्वलय् ब्वति कायेगु ग्वाहालि यायेगुलिइ नं प्रतिवद्धता प्वंकूगु गुथिं जानकारी बिउगु दु ।
वइगु अगस्ट ८ य् ‘नेथन फिलिप्स स्क्वायर’य् जुइगु १८ क्वःगु हिमालय मेला जुइत्यंगु दुसा उगु मेलाय् गुथिं नेवाः सांस्कृतिक व सम्पदाया विषयय् ब्वज्या यायेगु तयारी यानाच्वंगु दु ।
LEAVE YOUR COMMENTS