कोरोना भाइरस : अमेरिकाय् सीपिं छगू लखं अप्वल

येँ – हलिंन्यंक न्यनाच्वंगु कोरोना भाइरसा (कोभिड-१९)या महामारीया कारणं संयुक्त राज्य अमेरिकाय् छगू लख स्वयां अप्व मनूत सीगु दु । काभिड-१९या कारणं प्यलाया दुने अमेरिकाय् छगू लख स्वयां अप्व मनूत सीगु खः ।

जोन हप्किन्स विश्वविद्यालयया कथं अमेरिकाय् आः तक छगू लख ४ सयय १८म्ह मनूत सीधुंकूगु दु । थ्व तथ्यांक अमेरिकाया ४४दँया इतिहासय् कोरिया, भियतनाम, इराक व अफगानिस्तान युद्धया इलय् सीपिं सैनिकतय् ल्याः बराबर खः ।

अथेहे १६ लख ९९ हजार १ सय २६म्ह मनूत भाइरसपाखें संक्रमित जूगु दु । थ्व ल्याः हलिन्यंकया फुक्क देय्या संक्रमिततय् ३० प्रतिशत खः ।
अमेरिकाय् दकलय् न्हापां जनवरी २१ तारिक कुन्हु वासिङटन राज्यय् संक्रमन खनेदुगु खः ।

सन् २०१९या डिसेम्बरय् चीनया वुहान शहरं सुरु जूगु महामारीया कारणं ५६ लख मनूत संक्रमति जूगु दुसा ३ लख ५४ हजार मनूत सीधुंकूगु दु । झण्डै २५ लख मनूत कोरोना भाइरसपाखें मुक्त जुयाः लनेधुंकूगु दु ।