किम चीन भ्रमणय्

उत्तर कोरियाली नेता किम जङ अन हाकनं चीनया भ्रमणय् वंगु दु । चिनिया राष्ट्रपति सि जिन पिंङया निमन्त्रणाय् नेता अन चीनया स्वन्हुया भ्रमणय् वंगु खः । उत्तर कोरियाली संचार माध्यमतय्सं थुकिया पुष्टि यायेधुंकूगु दु । उत्तर कोरियाली नेता किमया थ्व दछिया दुने जक थ्व प्यक्वःगु चीन भ्रमण खः ।

किम आः वइगु जनवरी १० तक थः कलाः रि सोल जु लिसे चीनय् दइगु खँ उत्तर कोरियाली समाचार एजेन्सी केसिएनं धाःगु दु । उत्तर कोरियाली नेता किम व अमेरिकी राष्ट्रपति डोनाल्ड ट्रम्प दथुइ हाकनं वार्ता जुइफइगु सम्भावना बारे खँ पिहां वयाच्वंगु इलय् किम चीनया भ्रमणय् वंगु खः ।

वंगु जुन महिनाय् ट्रम्प लिसे वार्ता याये न्ह्यः नं किम चीनय् निं न्हापां वंगु खः । अमेरिका लिसे वार्ताया खँ मवःबलय् तक थःगु खुदँया शासन कालय् नेता किमं छक्वः नं चिनिया राष्ट्रपतियात नापमलाः ।चीन उत्तर कोरियाया प्रमुख कुटनीतिक मित्र जुयाच्वंगु दु । लिसें व्यापार व मेमेगु क्षेत्रय् नं चीनं हे न्ह्याबलें साथ यिबा वयाच्वंगु दु ।

उकिं अमेरिका लिसे जुइगु छुं नं ऐतिहासिक वार्ताया निंतिं नेता किम चीनया सल्हा कायेत उखे वनेगु यानाच्वंगु खः ।किमं आः चीनया भ्रमण यानाच्वंगु कारणं याकनं हे अमेरिका व उत्तर कोरिया दथुइ मेगु शिखर वार्ता जुइफुगु अनुमान यानाहःगु दु । छुं न्हि न्ह्यव जक अमेरिकी राष्ट्रपति ट्रम्पं किमलिसे आः गन नापलायेगु धयागु बारे याकनं सार्वजनिक यायेगु खँ धयादीगु खः ।

दक्षिण कोरियाया लसकुसउत्तर कोरियाली नेता किमं यानाच्वंगु चीन भ्रमणयात दक्षिण कोरियां लसकुस याःगु दु । दक्षिण कोरियाली राष्ट्रपति कार्यालय ब्लु हाउसं भ्रमणया लसकुस याःगु खः । कोरियाली प्रायःद्वीपय् शान्ति कायम यायेगु निंतिं थ्व भ्रमणं ग्वाहालि याइगु आशा नं यानातःगु दु ।

ब्लु हाउसया प्रवक्ता किम एइ कुमं छगू पत्रकार सम्मेलनय् न्ववासें कोरियाली प्रायद्वीपय् पुरा निःशस्त्रीकरण व स्थायी शान्ति हयेत थ्व भ्रमणं ग्वाहालि जुइगु आशा प्वंकादीगु खः । वय्कलं थ्व भ्रमणं उत्तर कोरिया व अमेरिका दथुइ जुइ धयातःगु निगूगु चरणया वार्तायात ग्वाहालि जुइगु खँ नं धयादीगु दु ।