धाकुफय् वयेत्यंगुलिं द्वलंद्वः मनूतय्त सरे यात

एजेन्सी- अमेरिकाया लुइजिआना राज्यय् च्वनाच्वंपिं द्वलद्वः मनूतय्त ‘आइदा’ नांयागु ग्यनापुगु धाकुफय् वयेत्यंगुलिं सुरक्षित थासय् यंकूगु दु । थ्व राज्यय् च्वनाच्वंपिं द्वंलद्वः मनूतय्त राज्यया प्रशासनं ‘आइदा’ धाकुफय् वइगु ख्याच्वः बिसें सुरक्षित थासय् वनेत सुझाव बिउगु खः । थ्व धाकुफय् स्थानीय ईकथं आइतवाः सनिलय् गल्फ अफ मेसिक्कोय् थ्यनीगु अनुमान दु । थ्व धाकुफय् २२० किलोमिटर प्रति घण्टाया ल्याखं वइगु व थुकिं यानाः समुद्रय् तच्वयेक लबु दना वइ धयातःगु दु । थ्व धाकुफय् १५० दँलिपा वयेत्यंगु खः ।

धाकुफय् वइगु जूगुलिं लुइजिआना राज्यया नापं लाःगु मिसिसीपिइ नं संकटकाल घोषणा याःगु दु । अमेरिकाया राष्ट्रपति जो बाइडेनं ‘आइदा’ धाकुफय् तसकं ग्यानापुगुलिं राज्य सरकारयात माःगु ग्वाहालि यायेत थः तयार दुगु नं धाःगु दु ।

अमेरिकाया न्यू अर्लियन्सय् सन् २००५य् क्याट्रिना नांयागु थथे हे ग्यानापुगु धाकुफय् वःबलय् १८ सयसिबें अप्वः मनूत सीगु खः ।