बांग्ला विमानया पाइलटया कलाःयात ब्रेन स्ट्रोक

नेपालय् दुर्घटना जूगु युएस–बांग्ला विमानया पाइलट क्या. अविद सुल्तानया कलाःयात मस्तिष्काघात (ब्रेन स्ट्रोक) जूगु दु । बंगलादेशया अनलाइन पत्रिका ‘द डेली स्टारं’ बिउगु समाचार कथं क्या. सुल्तानया कलाः मय्जु अफसाना खानम्यात म्हिगः सुथय् ४ बजे ब्रेन स्ट्रोक जूगु खः ।

बंगलादेशया उत्तरा धाःगु थासय् च्वंगु थःगु हे छेँय् वयात ब्रेन स्ट्रोक जूगु खः । वयां तुरुन्त हे लिपा अस्पताल यंकाः सुथय् ७ बजे अपरेशन समेत याःगु खँ समाचारय् धयातःगु दु । नेपालय् जूगु विमान दुर्घटनाय् लानाः वय्कःया जहान क्या. सुल्तान लगायत उडान पुचःया प्यम्हं दुजःया ज्यान वंगु खः ।

थ्वहे झ्वलय् विमान दुर्घटनायात कयाः बंगलादेशय् गठन याःगु छानबिन पुचःया अध्यक्ष क्या. सलाहुद्दिन एम. रहमातुल्लां दुर्घटना जूगु युएस–बांग्ला विमानय् छुं हे प्राविधिक खराबी मदुगु दावी यानादीगु दु । लिसें विमानया पाइलट क्या. सुल्तानयाके नं छुं हे समस्या मदुगु खँ वय्कलं कनादीगु दु । बंगलादेशी छानबिन पुचःया छगू टोली नेपालय् गठन जूगु छानबिन पुचःलिसे ज्या यायेत नेपाः वयेत्यंगु दु ।

मेखे थ्वहे इलय् बंगलादेशया हवाई व्यवस्थापनयात कयाः नं आपालं विवादया खँ सार्वजनिक जूगु दु । अन पाइलटतय्त तनावय् समेत ज्या याकीगु द्वपं नं वःगु दु ।