‘लिखित सम्पदात डिजिटाइजेशन थौंया आवश्यकता’
येँ (नेपालभाषा टाइम्स)/ पुर्खां तयाथकूगु लिखित सम्पदात डिजिटाइजेशन थौंया आवश्यकता जूगु खँ धाःगु दु । अर्काइभ नेपाल व युनेस्कोया ग्वसालय् शनिवाः जूगु छगू ज्याझ्वलय् न्ववासें येँ महानगरपालिकाया कार्यवाहक मेयर सुनिता डंगोलं पुर्खां तयाथकूगु थ्यासफू, बिलंपौ, ताडपत्र, शिलापत्र थेंज्याःगु लिखित सम्पदात न्हूगु पुस्ताया निंतिं उपहार जूगु खँ धयादिसें थुकिया संरक्षणया निंतिं डिजिटाइजेशन तसकं आवश्यक जूगु खँ धयादिल ।
‘पुर्खाया लिखित सम्पदा न्हू पुस्ताया निंतिं उपहार खः’ ज्याझ्वलय् न्ववानादिसें वय्कलं धयादिल, ‘पुर्खां च्वयाथकूगु थज्याःगु लिखित सम्पदात पुरातत्वविदपिनिगु निंतिं जक मखु, चिकित्सा, इन्जिनियरिङ ब्वनाच्वंपिनि निंतिं नं ज्ञानया भण्डार खः । थज्याःगु दस्तावेजपाखें न्हापाया चिकित्सा पद्धति निसें ततःधंगु सम्पदातय् निर्माण पद्धति बारे यक्व खँ सीकेफइ ।’
अथेहे युनेस्कोया निंतिं नेपाः प्रतिनिधि यान्को डु टोइटं लिखित सम्पदात संरक्षण यायेगु छगू संस्थाया जक दायित्व मखसे सकसियां दायित्व जूगु खँ न्ह्यथनादिसें युनेस्कों थज्याःगु सम्पदा संरक्षणय् मदिक्क ज्या यानाच्वनीगु खँ धयादिल । पुर्खाया ज्ञानयात सुचुकातयेगु मखुसे उकियात सकसिया निंतिं उपलब्ध यायेगु निंतिं थज्याःगु सम्पदा डिजिटाइजेशन व लिप्यान्तरण याये आवश्यक जूगु खँ वय्कलं धयादिल ।
अथेहे यल महानगरपालिका ६ वडाया नायः रुपेन्द्र शाक्यं पुर्खाया लिखित दस्तावेजत क्यनेमजिउ धकाः सुचुकातयेगु प्रवृतिं यानाः यक्व हस्तलिखित सम्पदात न्हना वनाच्वंगु खँ धयादिसें वय्कलं नकतिनि हे जक थःपिंसं रुद्रवर्ण महाविहारय् १२७ पौ दुगु तालपत्र लुइकागु खँ धयादिल ।
ज्याझ्वलय् पुलांगु हस्तलिखित ग्रन्थतय् ब्वज्याया लिसें थज्याःगु सम्पदात संरक्षणया आवश्यकता, ल्याय्म्हपुस्ताया भूमिका व भाषालिपियात कयाः अन्तक्र्रिया नं जूगु खः । अर्काइभ नेपालया सृष्टि मानन्धर सहजकर्ता जुयादीगु अन्तक्र्रियाय् हिरण्यवर्ण महाविहारया द्यःपाःलाः सुरेश वज्राचार्यं हिरण्यवर्ण महाविहारय् दुगु प्रज्ञापारमिताया संरक्षणय् जुयाच्वंगु ज्या लिसें थज्याःगु ग्रन्थय् दइगु ज्ञानया बारे खँ कनादिलसा लिखित सम्पदा संरक्षणय् ज्या याना वयाच्वनादीम्ह ल्याय्म्ह पुस्ताया प्रतिनिधि शिवेश शर्मां थः गुकथं थज्याःगु ग्रन्थपाखे आकर्षित जुल धयागु खँ कनादिल । अथेहे नेपालभाषा अभियन्ता नितु डंगोलं भाषा लिपिया जानकारी बिसें पुर्खां बियाथकूगु ज्ञानपाखें न्हू पुस्तां गुकथं लबः कायेफइ धयागु बारे कनादिल ।
ज्याझ्वलय् अर्काइभ नेपालया सरोजा हाकुदुवालं अर्काइभ नेपालं याना वयाच्वंगु ज्याया बारे कनादिसें आःतकया दुने थःपिंसं ३१ गू अभिलेखया ३३७९ पेज डिजिटाइजेशन यायेधुनागु व द्वःछि पेजं मल्याक हस्तलिखित पाण्डुलिपिया लिप्यान्तरण यायेधुनागु जानकारी बियादिल ।
अथेहे भाषा अभियन्ता रुक्साना कपालीं भाषा धयागु न्ववायेगु माध्यम जक मखसे पुर्खाया ज्ञानयात पुस्तान्तरण यानायंकेगु माध्यम नं जूगु खँ धयादिसें लिखित सम्पदातय् डिजिटाइजेशन कन्हय्या पुस्ताया निंतिं नं पुर्खाया ज्ञान सयेकेत लँ चायेकायंकेगु महत्वपूर्ण ज्या जूगु तायेकागु खँ धयादिल ।
पुलांगुया संरक्षण, भविष्यया सशक्तिकरण धयागु नारा सहित न्ह्याःगु ज्याझ्वलय् नेपालभाषाया थीथी लिपिं च्वयातःगु थ्यासफू प्रत्यक्षरुपं लिप्यान्तरण यायेगु ज्या नं जूगु खः ।
LEAVE YOUR COMMENTS