जापानय् शक्तिशाली वाफय्, ११ म्ह सित

टोकियो – जापानय् तच्वकं वःगु वा व शक्तिशाली वाफसं अनया जनजीवन गाक्कं प्रभावित जूगु दु । तच्वकं वःगु वा व ‘हागिबिस’ नां बियातःगु शक्तिशाली वाफसं झिंछम्ह सीगु दुसा ख्वीम्हं मल्याक घाःपाः जूगु दु । अथे हे दर्जनौं मनू तनाच्वंगु उद्धारकर्मितय्सं धाःगु दु ।
राजधानी टोकियोलिसें जापानया मेमेगु नं प्रमुख सहर शक्तिशाली हागिबिस वाफय्या कारणं तहसनहस जूगु दुसा जनजीवन नं बांमलाक्क प्रभावित जूगु दु ।

वाफसं प्रभावित जूगु थासय् उद्धार व वेपत्ता जूपिं मालेत सेना परिचालन याःगु दु ।शक्तिशाली वाफय् व समुद्री वाफसं लाके फइगु क्षतियात ध्यानय् तयाः प्रभावित लागाया करिब ७० लाख मनूयात सुरक्षित थासय् स्थानान्तरण यायेत अपिल याःगु दुसा आतकया दुने न्यय्द्वः स्वयां अप्वः मनू थःगु थाय्बाय् त्वःताः सुरक्षित थासय् वने धुंकूगु दु ।

प्रतिघन्टा २२५ किलोमीटरया गतिं वःगु वाफय् जापानय् वंगु खुगू दशक दुनेया दकलय् शक्तिशाली व खराब वाफय् जूगु समाचार संस्थातय्सं न्ह्यथंगु दु । तच्वकं वयाच्वंगु वा व वाफय्या कारणं हवाई सेवा तकं अवरुद्ध जूगु दु । हवाई सेवा अवरुद्ध जूगुलिं द्वःछिं मल्याक उडान प्रभावित जूगु दुसा विद्युत आपूर्ति व रेल्वे सेवा तकं अवरुद्ध जूगु दु ।

अथे हे विद्यालय व कलेजयातकं बन्द याना बिउगु दुसा थाय्थासय् विद्युतीय लठ्ठा व सिमा त्वःधूगुलिं सवारी साधन क्षतिग्रस्त जूगु नापं यातायात सेवा नं प्रभावित जूगु दु ।