अमेरिकापाखें होर्मुजय् सुरक्षाया खर्चया क्षतिपूर्ति माग

वाशिंगटन – अमेरिकी राष्ट्रपति डोनाल्ड ट्रम्पं होर्मुज जलमार्ग जुयाः वनीगु अन्तर्राष्ट्रिय समुद्री यातायातया सुरक्षा सुनिश्चिता अमेरिकां यानाच्वंगु धाःगु दु । राष्ट्रपति ट्रम्पं अमेरिकां म्हिताच्वंगु थ्व भूमिकाया आर्थिक लबः खाडी राष्ट्रतय्सं पुलेमाःगु नं धाःगु दु ।

लिसे अमेरिकां याःगु लिपांगु सैन्य कारवाही लिपा इरानया सैन्य क्षमता तसकं कमजोर जूगु दावी यासे ट्रम्पं तेहरानयात न्हापाया अवस्थासिबें तसकं लिउने घ्वाना छ्वया बियागु टिप्पणी नं याःगु दु ।

ओभलया ज्याकुथिइ पत्रकारतलिसें खँल्हाबल्हा यायेगु झ्वलय् राष्ट्रपति ट्रम्पं विश्वया हे दकलय् संवेदनशील व रणनीतिक समुद्री मार्गमध्ये छगू होर्मुजया सुरक्षाया निंतिं अमेरिकां तःधंगु जिम्मेवारी वहन यानाच्वनागु नं धाःगु दु । थ्व हे कारणं उगु लागापाखें प्रत्यक्ष लबः कयाच्वंपिं खाडीया देय्तय्सं अमेरिकायात आर्थिक क्षतिपूर्ति बीमाःगु ट्रम्पया धापू दु ।

‘न्यूज म्याक्स’यात बिउगु अन्तर्वार्ताय् ट्रम्पं अमेरिकी सैन्य कारवाही लिपा इरानया सैन्य संरचनाय् गम्भीर क्षति जूगु दावी यासें इरानया नौसैनिक शक्ति, हवाई क्षमता, राडार प्रणाली, हवाइ प्रतिरक्षा प्रणाली, हवाइ प्रतिरक्षा संयन्त्र व ल्वाभः उत्पादन यायेगु पूर्वाधारय् नं तःधंगु लिच्वः लाःगु ट्रम्पया धापू दु ।

ट्रम्पं इरानयाके दुगु १५१ गः नौसैनिक जहाजमध्ये अप्वः धयाथें नष्ट जूगु दावी यासे आः व दक्वं समुद्रया सतह क्वय् थ्यनेधुंकूगु टिप्पणी यासें इरानया थ्यंमथ्यं २०० विमान नष्ट जूगु, राडार व एन्टी एयरक्राप्ट प्रणाली ध्वस्त जूगु व ल्वाभः उत्पादनया क्षमता नं ८४ प्रतिशत कमजोर जूगु दावी याःगु दु ।